«Trenen talka» Aberri Egunean

Alderdiek agerian utzi dituzte euren helburu eta estrategien artean dauden aldeak. Abertzaleen elkarlanaz ohartarazi du PPk
EAJko buruzagiak, herenegun, Bilbon.
EAJko buruzagiak, herenegun, Bilbon. MONIKA DEL VALLE / ARGAZKI PRESS

Erredakzioa

2017ko apirilak 18
Aurten ere zatituta ospatu dute Aberri Eguna alderdiek. EAJk Bilbon egin zuen ekitaldia, eta Gernika-Lumon (Bizkaia) izan ziren EH Bildu osatzen duten alderdiak. «Ikuspegi berarekin», Uztaritzera (Lapurdi) deitu zuen herritar talde batek. Ezker abertzalearen ildo ofizialarekin kritiko diren zenbait taldek eta norbanakok, berriz, batzarra egin zuten Durangon (Bizkaia). Ekitaldiotan emandako mezuek Aberri Eguna osatu duten alderdien artean dagoen aldea erakutsi dute, euren helburu eta estrategiei dagokienez. EAJk «Euskadi eta Espainiaren arteko alde biko harremana» galdegin zuen herenegun, eta Gernikan erabakitzeko eskubidea. Ahal Dugu-k mahai inguru bat antolatu zuen Bilbon, Nagua Alba idazkari nagusiaren eta Bernardo Atxaga idazlearen artean; «aberria ulertzeko modu ezberdinak» babestu zituen Albak.

Ohi bezala, Bilboko Plaza Barrian bildu ziren jeltzaleak. Han, Iñigo Urkullu Eusko Jaurlaritzako lehendakariak «konpromisoa hartu» zuen «euskal nazioa progresiboki eraikitzen jarraitzeko», eta Espainiako Estatuari eskatu zion «nazio pluraltasuna» onartzeko. Antzera mintzatu zen Andoni Ortuzar EAJko presidentea. Azaldu zuen posible dela «burujabetza partekatzea» Espainiarekin, eta EH Bildukoei dei egin zien euren «bagoia» EAJren «trenera» batzeko. Mezu hori gogoan, abertzaleen balizko elkarlanaz ohartarazi zuen atzo PPk. «Trenen talka ekarriko luke horrek, Lizarrako garaietan bezala».

Jeltzaleekin mesfidati

Koalizio subiranista osatzen dutenak, berriz, kritiko azaldu dira proposamenarekin. Uste dute egungoaren oso antzeko estatutu bat adostu nahi dutela jeltzaleek Madrilekin, erabakitzeko eskubideari uko eginez. Aldarrikapen hori babestu zuten, hain justu, Gernika-Lumon. Han, besteak beste, Independentistak sareko Txutxi Ariznabarretak aitortu zuen burujabetzarako bidean lan asko dagoela egiteko, baina horretarako indarra eta gogoa badagoela: «Herri bat martxan dagoenean, dena da posible». Azpimarratu zuen «garaipen» bakoitza erabili behar dela «borroka berriak» abiatzeko.

Horrekin loturik, atzo, Gernika Batzordeak eta Independentistak sareak ohar batean nabarmendu zuten «herri honetan ilusioak pizten» hasi direla, eta ETAren armagabetzea dela-eta Baionan bildutako jendetza eta igandean Iruñean Korrikaren amaieran bildutakoa gogoratu zituzten. «Aberri Egunak burujabetza prozesuaren zikloa zabaldu duela esan dezakegu», azpimarratu dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna