Albistea entzun

KRITIKA. Dantza

Beti aldakor, beti bizirik

Agus Perez -

2017ko azaroak 29

'Pequeños actos'

Konpainia: Cielo raso. Zuzendaritza: Igor Calonge. Zuzendari laguntzailea: Gabriel F. Argiak: Pedro Fresneda, Raquel Hernandez. Dantzariak: Gorka Gurrutxaga, Nekane Mendizabal, Leire Otamendi, Beñat Urretabizkaia. Lekua: Donostiako Gazteszena aretoa. Eguna: Azaroak 26.

Gazteszena aretoaren moldakortasuna baliatuta eta ohiko besaulkiak kenduta, karratu handi bat marraztu dute argi lerro zuzenek besaulkiek utzitako hutsunean, eta ikusleak eremu hutseko hiru aldetan jesarri dira, boxeo-ring baten inguruan baleude bezala. Lekua hartzen genuen bitartean bi neska zeuden zorutik bueltaka, arpel-harrien antzera, arloa alde batetik bestera zeharkatzen, abiadura geldoan eta mantra kutsuko musika lasai batean bilduta.

Emanaldia benetan hasi denean, beren ibilbide paraleloen abiadura areagotu dute bi neskek, ia paroxismora heldu arte, eta hasiera leundu hori —ez-ikuskizun egoeratik ikuskizun egoerara suabe-suabe eraman gaituena— pieza honen asmatze nagusietarikotzat jo behar dugu, eremu eszenikoaren diseinuarekin batera.

Hortik aurrera, eta izenburuari kasu eginez —Pequeños actos (Egitate txikiak)—, hainbat eszena labur etorri dira bata bestearen atzean, zein baino zein iradokitzaileagoa, donostiar koreografoaren inspirazio oparoari jarraikiz eta lau dantzarien bikaintasun eztabaidaezinean bermatuta. Bide horretatik, aharien modura oldartu dira bi gizonak, alderantzizko V bat eginez, besoak luzatuta eta eskuetatik helduta, eta jarraian uretan baleude bezala aritu dira bi emakumeak, zorutik egindako eboluzio paralelo perfektuek eta ispilu-bolatik irtendako argi-efektuetan murgilduta. Musika, argia, gorputzen eboluzio pausatu eta neurtuak... dena egin zaigu lagungarri eta denak lagundu digu ametsetan bezala egoten.

Calongek berak esku-programan azaldu bezala, «umetan izandako begitazio guztien arteko lotura etengabea, irudimenaren txatal txikiak, ahalmenaren oihalkiak, oroimenaren boterearenak» bilatzen ditu, eta ez da irudi onirikorik falta izan oroimen zatiekin egindako sorkuntza honetan. Haien artean, bereziki ederrak begitandu zaizkigu espazio karratua ausazko mugimenduekin korritu duen mutilaren irudia, neskaren soinekoa haizearen eraginez erantzi deneko eszena eta, nola ez, besaulki tolestuetako horma bertikaletik dantzariek gauzatu dituzten noraezeko ibilbideak.

Une jakin batean, lau txokoka jolasean baleude bezala ibili dira dantzariak, betiere abstrakzioaren eremu emankorretik irten gabe eta haietariko bakoitzak bere pasarte dantzatu pertsonalak burutzen zituela, besteek egindakoekin loturarik logikorik ezarri gabe, horrela eginez gainontzekoen jazarpen dantzatuetatik libratzeko esperantzan. Beharbada horretan datza oroimenaren sorginkeria, eta horregatik erakartzen gaitu dantzaren eta sugarraren itxura errariak. Bata zein bestea harrapaezinak direlako, beti aldakor sugarra, beti bizirik dantza.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JOSEPH PHILLIPS

BIZITZAK DANTZAN

Ainhoa Sarasola

Dantzaren sektoreko profesionalen prekaritatea agerian jarri du ikerketa batek. Aldizkakotasun handia, ordain apalak eta beste lan batzuetan jardun beharra nabarmentzen dira, besteak beste, datuen artean. Aurrera egiteko bide malkarra azaldu dute profil desberdineko hiru dantzarik.
 ©BERRIA
The Arcs taldeko kideak Richard Swiftekin (eskuinean, zutik) batera. ©BERRIA

Dezibelak eta epika

Urko Ansa

Argitaratzailea: egilea editore.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.