Bizkarze Iratiko Txaletetatik

Ibilaldi xume baina bizigarria egingo dugu terraza handi berde honetaraino, eta Orhi mendi tontorra, Iratiko oihan sarria eta Abodiko mendilerroko bizkarrak miretsi ahalko ditugu. Paisaia ikusgarri ugari dituen txango atsegina da.
Millagate gailurreria, Leherra mendi lepotik.
Millagate gailurreria, Leherra mendi lepotik. GORLA LOPEZ Tamaina handiagoan ikusi

Gorka Lopez -

2015eko abenduak 8

Iratiko Txaleten aldeko aparkalekutik abiatuko gara; errepidea gurutzatuko dugu, eta etxola batzuk besteekin lotzen dituen bidetik joko. Baliza zuri-gorriei segituko diegu; hesola batean ageri denez, GRT 10 ibilbideari dagozkio, eta GR 12 ibilbiderantz doaz. Azken etxolaren behealdean, bihurgune bat agertuko zaigu, eta haren eskuinetara, desbideratze bikoitz bat; hura laga, eta beste idazkun bateko argibideei segika, bidezidor batetik joko dugu, erreiaren eta pistaren erditik, zeina GRT 10etik barrena baitoa Organbidexkako gailurreraino.

Bidezidorrean gora, pagadi baten magal malkartsutik igoko gara, eta Organbidexkako gailurreriako adar berderaino iritsiko; behin han, oso atzera ikusiko dugu basoa, eta Orhi tontorraren irudia gailenduko zaigu erabat paisaian. Eskuinaldetik joko dugu Organbidexkako gailurrerian, antena multzo baten paretik igaroko gara, eta asfaltozko pistan behera egingo dugu, zeina baitute komunikabide eremu horretan sakabanaturik dauden bordek. Errepidearen gain-gainetik doan bidezidor bateko muino bazterretik joango gara, baina errepidera sartu gabe, eta hala iritsiko gara Mehatze mendi lepora.

Mendi lepo horretan, GRT 10 lagako dugu, eta ezkerraldeko bidezidorretik joko, zeina edaska eta erreka baten aurrez aurre amaitzen baita. Errekaren gainaldeko mendi lepotik igoko gara, eta zelai batekin topo egingo dugu; zelai hori pista batek erdibitzen du, eta pista hori gurutzatuz, irtengune harkaiztsu bat ikusiko dugu aurrez aurre, eta harantz egingo. Irtengune horren ezkerraldeko ertzetik ibiliko gara, usategi ildo batetik barrena, eta pistaren beste adar batekin topo egingo dugu. Pistan behera joko dugu Arratzolate bordarantz, zeina Pellüsagañeko magal berdearen pean baitago; baina bordara iritsi baino lehen lagako dugu pista, bihurgune bat egiten duen zatian, eta eskuinetara ikusiko dugun bidezidor batetik joko.

Bidezidor horretatik, zelai batera iritsiko gara, erreka bat gurutzatuko dugu, eta eskuinaldetik gorantz ibiliko gara metro batzuetan, gainaldeko bidezidorrera iritsi arte. Bidezidor horretatik magalez magal ibiliko gara Pellüsagañean eta Odeizügañan barrena, eta, magal horietako tolestura bat gurutzatu eta gero, harkaitz bat aurkituko dugu aurrez aurre, eta haren oinarrira joango gara. Behin harkaizpean gaudela, eskuinera bira egin, eta Millagate gailurreko igarobide bateraino igoko gara; haren aurrez aurre ikusiko dugu, zutunik, Bizkarze gailurra. Mendi magalaren eskuinaldetik segituko dugu, bidezidor lauso batetik, Leherra mendi lepoan amaitzen den errepidearen gainetik.

Leherrako bidegurutzean, ezkerrera joko dugu, eta diagonal bat marraztuko bi mendi bizkar berdeen artean; zuzenean iritsiko gara horietako batera, eta haren atzean ikusiko dugu Bizkarze muinoa. Haren oinpeko panorama ikusgarriaz gozatu ahalko dugu, eta, gero, Leherrara egingo dugu atzera, errepidea gurutzatu, eta mendi mazela malkartsuan gora egingo dugu Odeizügaiñeraino iritsi arte. Behin bigarren mailako garaiera hori zeharkatuta, Sensibilie mendi lepo konkortsuan behera egingo dugu, eta antzeko muino batera igoko gara berriro, Pellüsagañera.

Gailur biribilkara horren eskuinaldetik egingo dugu beherantz, usategien ildotik, Arratzolate bordarako pistaren eta GRT 10 ibilbideari dagokion pista asfaltuzkoaren arteko lotunerantz. Behin han, ezkerraldetik inguratuko dugu irtengunea, joanekoan ez bezala, asfaltuzko pistaren paraleloan, eta Mehatzeko mendi lepora itzuliko gara; handixe hasiko dugu behin betiko itzulbidea, nonahitik ageri zaigun Orhiren silueta beti miragarriaren pean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©LEOBIANCA PHOTOGRAPHY

«Akatsik ezin da egin Real Madrili irabazi nahi bazaio»

Iñigo Lasa

Alaves eta Real Madrilen arteko partida «polita» eta «lehiatua» izatea espero du Ivan Campok. Bi taldeetan jokatutakoa da, bere ibilbideko bi fase ezberdinetan.
Elordi eta Arteaga pilota aukeraketaren egunean. ©JON URBE / FOKU

Hazten segitu ahal izateko txapela

Ainara Arratibel Gasconb

Bigarren Mailako buruz buruko finala jokatuko dute gaur Arteagak eta Elordik. Bi pilotariak «gogotsu» daude gaurko norgehiagokarako
Teresa Errandonea, maskara jantzita entrenatzen, Donostiako belodromoan. ©JON URBE / FOKU

Entrenatu ere, maskararekin

Ainara Arratibel Gascon

Atletek maskara jantzita izan behar dute entrenatzeko. Ivan Fernandezek eta Teresa Errandoneak diote errespetatzen duten arren zaildu egiten diela beraien prestaketa.
Joseba Zaldua, baloi bat lehiatuz. Atzelari donostiarrak bere lehendabiziko partida jokatu du aurtengo Europa ligan. ©OLAF KRAAK / EFE.

Kilimarik egin gabe

Jon Ander De la Hoz

Reala lotuta aritu da AZ Alkmaarren zelaian, eta puntu bat zakuratuta itzuli da Donostiara. Txuri-urdinek bizirik segitzen dute Europa ligan, zazpi punturekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.