Elikadura. Errezeta

Zainzuri frijituak, ziazerba kremarekin

JON URBE / ARGAZKI PRESS

Iker Markinez -

2012ko otsailak 25
OSAGAIAK

4 pertsonarentzako osagaiak:

Kontserbako 12 zainzuri handi.

Ziazerba sorta eder bat.

Tipulina sorta bat.

2 patata.

Esne gain basokada bat.

Esne basokada.

Oliba olio birjina.

Irina.

Arrautza irabiatua.

Gatza.

Piper hauts beltza.

Ziazerba krema prestatzen hasiko gara lehenik. Horretarako, lapiko batean esne eta esne gaina sutan berotzen jarri. Tipulina lau pusketatan moztu eta lapikora bota.

Patatak zuritu, eta horiek ere pusketa handietan moztuta lapikora gehitu. Gatz eta piper hauts pittin bat gehitu. Ur pixka bat bota, eta ordu erdiz irakin, su ertainean.

Bitartean, ziazerbak garbitu. Ordu erdia igaro ostean, ziazerbak lapikora gehitu. Beste 15 minutuz irakiten eduki. Sua itzali, oliba olio zorrotada on bat bota, eta irabiagailuan pasatu, krema goxo bat lortu arte.

Kontserbatik zainzuriak atera, eta ur soberakina ondo kendu. Ondoren irinetik pasatu, eta jarraian, arrautzatik. Zartagin batean oliba olioa jarri, eta, beroa dagoenean, bertan frijitu minutu batez alde bakoitzetik. Ateratzerakoan, sukaldeko paperez estalitako platerean jarri. Olio soberakina kendu ondoren, erretilu baten erdian kokatu. Bukatzeko, gainetik bustiko ditugu ziazerba kremaz.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna