Olagarro entsalada epela

JON URBE / ARGAZKI PRESS.
Iker Markinez.
2012ko maiatzaren 12a
00:00
Entzun
OSAGAIAK

4 pertsonarentzako osagaiak:

2,5 kg olagarro izoztu

2 motatako letxuga

Tipulina

Azenarioa

Piperrauts gorria

Gatz lodia

Lehen sakaldiko oliba olioa

Ozpina

2 patata

Olagarroa izozkailutik atera eta egun oso batez hozkailuaneduki.

Olagarroa egosteko, lapiko handi bat urez bete, eta sutan berotzen jarri. Irakitean olagarroa sartu, eta segituan atera berriro. Hiru aldiz egin hori, eta hirugarrengoan uretan utzi. Su ertainean egosten eduki hamar bat minutuz. Ondoren, patatak zuritu eta bota osorik lapikora. Beste 25 bat minutuz irakiten eduki. Sua itzali eta hamar bat minutuz bertan eduki. Bitartean, letxuga hostoak garbitu eta lehortu. Ondoren, zati txikietan moztu. Ontzi batean jarri, eta tipulina ere xehe-xehe moztua bertara gehitu. Berdin egin azenarioekin. Zuritu ostean xehe-xehe moztu, azalak zuritzekoaren laguntzaz. Gatz pitin bat gehitu eta ozpin txorrotada bat eta oliba olioaren pare bat txorrotada bota. Guztia ongi nahastu.

Olagarroa lapikotik atera. Guraizeen laguntzaz, lehenik, burua kendu. Gainontzekoa pusketatan moztu. Patatak ere atera eta pusketatan moztu. Patata puskak plater bakoitzaren erdian jarri; ondoren, entsalada gainean eta buelta guztian olagarro pusketak jarriko ditugu. Azkenik, piperrauts gorriaz estali, norberaren gustura. Gatz lodi pixka bat bota eta txorrotada bat oliba olioz busti.
Iruzkinak
Ez dago iruzkinik

Ordenatu
0/500
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.