Euskal estatua «herritarren eskubideak» bermatzeko nahi du EH Bilduk

Koalizioak estatugintzaren inguruan antolaturiko jardunaldiak hasi dira Bilbon. Pello Urizarrek «berdinen arteko harremana» proposatu du
Maddalen Iriarte eta Pello Urizar, Bilboko jardunaldietan.
Maddalen Iriarte eta Pello Urizar, Bilboko jardunaldietan. ARITZ LOIOLA / FOKU

Gotzon Hermosilla -

2018ko ekainak 20
Hasi dira Bilbon EH Bilduk antolatu dituen jardunaldiak, Euskal estatuaren bidean: erronkak eta aukerak izenburupean, eta, hasiera ekitaldian, EH Bilduko legebiltzarkide Maddalen Iriartek esan du euskal estatuaren eginkizuna «herritarren eskubideak» bermatzea litzatekeela. «Zergatik estatua?», galdetu du Iriartek: «Libreak izateko. Estatu duina nahi dugulako, hezkuntzan eta zientzian oinarritutako gizartea nahi dugulako. Libre izan nahi dugulako, demokrazia nahi dugulako».

Iriartek ohartarazi du herritarrek izan behar dutela estatua eraikitzeko prozesuaren zutabe, eta «oso zaila» litzatekeela prozesu hori azken bururaino eramatea herritarren sostengurik gabe, baina «guztiz ezinezkoa» herritarrak kontra agertuz gero. Horregatik, kontrako jarrerak «desaktibatzearen» eta aldekoak sustatzearen alde azaldu da.

Pello Urizar legebiltzarkideak ere parte hartu du jardunaldietako hasiera ekitaldian, eta esan du azken urteotan autogobernua murriztuz joan dela. Horregatik, «berdinen arteko harremana» proposatu du Espainiako Estatuarekin izan beharreko harreman molde gisa.

Eusko Legebiltzarreko Autogobernu Batzordean EH Bilduk aurkeztu duen estatus berrirako proposamena aletu du Urizarrek, eta esan du erabakitzeko eskubideak «printzipio demokratiko gisa» oinarri izan behar duela. Azaldu duenez, EH Bilduk proposatzen du botere legegile, judizial eta betearazlea ez ezik «herritarren laugarren boterea» ere ezartzea, politika publikoen fiskalizazio lana egiteko.

EH Bilduko Estatugintza idazkari Larraitz Ugartek aurkeztu ditu jardunaldiak, eta esan du horien helburua «euskal estatuaren aldeko diskurtsoa arrazoiz hornitzea» dela.

Jardunaldien lehenengo saioan Euskal Herriko egituratze instituzionala, harreman ekonomiko eta finantzarioak eta Europako Batasunaren argi-ilunak aztertu dituzte zenbait adituk.

Jardunaldiak gaur amaituko dira, eta amaiera ekitaldian Arnaldo Otegi, Robin McAlpine, Mairtin O'Muilleoir eta Elisenda Paluzie egongo dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna