Albistea entzun

KRITIKA. Antzerkia

Pilulak airean

2Theatre konpainiaren <em>Boris & Ingrid</em> antzezlaneko irudi bat.
2Theatre konpainiaren Boris & Ingrid antzezlaneko irudi bat. 'WWW.2THEATRE.COM'

Agus Perez -

2017ko martxoak 29

'Boris & Ingrid'

Konpainia: 2Theatre. Antzezleak: Txema Perez, Svetlana Biba. Musika: Mikey Kirkpatrick (Bird Radio). Lekua: Azkoitiko Matadeixe gune autogestionatua. Eguna: Martxoak 26.

Joan den igandean Azkoitiko Matadeixe ezagutzeko parada eduki dugu. Hango gazte jendeak, lokal berezi, hurbil eta txukunaz arduratzeaz gain, zortzi urte daramate antzerki jardunaldiak egiten, eta aurtengoetan Londrestik gurera salto egin nahi duen 2Theatre konpainiaren Boris & Ingrid lana ikusi dugu. Bertan egon aurretik Bilbotik ere ibili dira, eta, bitxia bada ere, aretoa betetzen zuten ikusleen artean sei bilbotar zenbatu dut, ni neu barne, dena esan behar bada.

Konpainiaren jatorriak azalpen txiki bat merezi du, bi antzezle sortzaileak oso leku diferentetatik datozelako: Txema Perez euskalduna Bilbon jaio zen, eta Svetlana Bibak ukrainar-suediartzat jotzen du bere burua. Biak ala biak hezi dira nazioarteko prestigio gorena daukan London International School of Performing Artsen, eta bistan da haiekin batera datorren musikariak kategoria bereko iturrietatik edan duela, haren maila bikaina eta jokatu duen rol eszenikoa ikusita.

Zahartzaro betean sartuta daude Boris eta Ingrid. Itsusiak dira orain, tripaundia da gizona, hanka okerrak ditu emazteak, betaurreko panoramikoak darabiltzate biek, eta haginak... hobe haginei gehiegi ez erreparatzea. Adinaren errutinetan murgilduta dabiltza, egunero hartzen dituzte pilulak, haietariko gehienak airean galdu arren, beti uste dute seme-alabak —umeak deitzen diete oraindik— bisitan etorriko zaizkiela. Baina egunero datorrena gizarte-zerbitzuetako gaztea baino ez da —Mikey Kirkpatrick musikaria— eta gure protagonistek beti galdetzen diote beren buruari ea nor ote den erizain jantzita agertzen den hori.

Ikusle sakrifikatu baten laguntzaz igo dira aitaita-amonak eszenatokira, eta enegarren eskuko alfonbra eta altzari zatarren artean praktikatu dituzte bi antzezle zailduek antzerkiaren arteak eman ditzakeen fruiturik onenak, inspirazio eta ganora handiz praktikatu ere. Pailazo-teknikak egon dira horren guztiaren azpian, baina ez dugu pailazokeriarik ikusi; gauza asko esan digute, baina oso hitz gutxi entzun dugu —batzuk ingelesez baina gehienak euskaraz—; barrez lehertzeko zorian egon gara, eta bitartean, bakardadeaz, gorputzen endekatzeaz eta heriotzaren osteko misterioaz hausnartu dugu.

Eta horren guztiaren gainean, teknika erakustaldi ederra eman digute interpretazioan, itzal-antzerkian, txotxongiloen kontzeptuan, objektuen maneiuan eta musikari emandako esanguran. Dena pertinente, dena neurrian, dena metaforiko, dena kargaz betea, bihotzez betea, samurra, inteligentea, ezin hobeto kuzinatua. Bost izarretakoa. Gure errai tristatuek bereziki behar zutena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b>Artze anaiak.</b> Txalaparta erakustaldia Iruñeko 1972ko Topaketetan. ©BERRIA

ARTE KONSTELAZIO BAT IRUÑEARI OPARI

Yasmine Khris

Iruñeko 1972ko Arte Topaketen 50. urteurrena ospatuko da aurten, eta orduko oroitzapenak bizirik dituzte batzuek. Xabier Morras margolariak, esaterako, kontrastez beteriko hiriaren irudia ekarri du gogora. Zentsurak, polemikek eta artisten aniztasunak ezaugarritu zuten topaketa.

 ©BERRIA

«72ko topaketen oroitzapena ez da anekdotikoa, baina ia»

Yasmine Khris

Ofizioz idazlea da Andres, baina komisario lanean arituko da aurten, 1972-2022ko Topaketetan. Urriaren 6tik 18ra eginen dira eta 70 jardunaldi baino gehiago antolatzeaz arduratu da.
Walter Salas-Humara (eskuinean), gaur egun The Silos osatzen duen hirukotearekin. ©BERRIA

Musikaren plazera

Mikel Lizarralde

1980ko hamarkadan AEBetan sortutako sustraidun rockaren ordezkari da The Silos, Walter Salas-Humararen proiektua. Bi kontzertu ditu Euskal Herrian egunotan.

Mende erdia bete berri da Alejandra Pizarnik hil zela. ©BERRIA

Zauri diren lerroak

Ainhoa Sarasola

Sufrimendu biziko aldiak eta sormen loraldiak tartekatu ziren Alejandra Pizarnik idazle argentinarraren bizialdi osoan. Beldurrari, maitasunari eta bakardadeari idatzi zien, eta XX. mendeko poema bilduma nabarmenetako bat osatu zuen. 50 urte bete dira hil zenetik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...