Espainiako hedabideak izugarri gozatzen ari direnik ezin ukatuko dugu. Zuzentzen dituztenetatik hasi eta ahotsa eta aurpegia jartzen dituzteneraino jo, «esaten genizuen ba guk!» irribarre gurasokeriazkoa ezkutatu ezinik dabiltza Puigdemontek Comini bidalitako mezu pribatu batzuk harrapatuaz harro. «Kataluniako errepublikaren azken egunak», «bukatu», «Moncloaren planak irabazi», «lotsagarrikeria historikoa», «porrota»... zerutiar doinu zaizkie eta behin eta berriz errepikatzen dituzte.
Ez dakit zenbateraino den etikoa pribatutasuna horrela urratzea. Min, niri, nahasmenak ematen dit. Elkarren segidan aurkezten dituzte Puigdemonten mezuak eta kantari entzutetsu baten alaba mediatikoak bere senargai ohiaren neska lagun berriaren lehengusinari bidalitakoak. Eta gero berriz itzuliko dira, presaka, Bruselan duten berriemailearekin konexioa egitera eta segidan helduko diote kiwiek azalean duten eragina aztertzera atzera, presaka, Kataluniako Parlamentura jotzeko.
Nahasmena sumatzen da Kataluniako independentisten artean ere. Prozesuari ekin zioten garaian bazekiten «eutsi» fase bat helduko zela. Hauteskundeetan eutsi zioten. Kalean eta erakundeetan nola eusten zaion da orain gakoa. «Hautsi» ez den bitartean...
HITZ ETZANAK
Nahas-mahas
Iruzkinak
Ez dago iruzkinik
Ordenatu