Haizea

Datorrena datorrela. Esan egiten da, baina ez dirudi inork gustuko duenik zer datorren jakin gabe bizitze hori. Non gauden edo nora goazen, sakelakoaren pantailan begiratuko dugu zein ordutan zein eguraldi egingo duen, eta horren araberako erabakiak hartuko ditugu. Igande gauez bederatziak alderako etxeratu ginen haize bolada handiak zetozela eta. Hor nonbait ibiltzen dira gainera iragarpenetan eta ohitu egin gara jaramon egitera. X-treme jarduerak asmatu behar izan ditugu bizimoduari emozio pittin bat ostu ahal izateko.

Informatiboak gerra berriekin hasten dira orain eta eguraldi iragarpenarekin amaitu. Badu logika bat, antipatikoa eta sinpatikoa nahasian emateaz gaindikoa. Orain ehun urte ere elkarren sokakoak ziren. Eguraldi iragarpenak zehatz egin nahian ez ziren hasi herritarren ongizateari begira. Hasi ziren Lehen Mundu Gerra Europa iparraldeko zelai lokaztuetan burutu zelako. Eta garrantzitsua zelako noiz lubakietatik irten eta erasora jo erabakitzeko orduan zetorren eguraldiaren berri ahalik eta zehatzen izatea.

Lehor esanda, egunsenti edo ilunabar gorrizta guztiak ez dira beti orain azaltzen zaizkigun bezain eder eta erromantikoak izan. Eta egun ere ez dira hala munduko zelai askotan.