Osasunak lidergoari eutsi nahi dio gaur, Sadarren Nastici irabazita

Eñaut Agirrebengoa -

2019ko martxoak 2
GIMNASTIC-OSASUNA

Osasuna. Ruben; Nacho Vidal, David Garcia, Unai Garcia,Clerc; Oier, Fran Merida; Roberto Torres, Ruben Garcia, Brandon eta Xisco.

Gimnastic. Barragan; Salva, Villanueva, Noguera, Abraham, Fali; Pipa, Thioune, Cotan, Barrada eta Kante .

Epailea. Lopez Toca.

Lekua. Sadar (18.375 ikusle).

Ordua. 18:00 (Liga 123).

Iragan jardunaldian Bigarren Mailako lider bihurtu ostean, goiari eusteko erronka du orain Osasunak. Jagoba Arrasateren taldeak gaur bertan izango du lehen azterketa, Sadarren, ataka estuan den talde baten kontra. Sailkapenean azken-aurrekoa da Nastic, 21 punturekin, eta mailari eustea ahalbidetzen duten postuetatik seira dago. Nafarren teknikari ohi Enrique Martin Monrealek du kataluniarrak jaitsieratik libratzeko ardura. Gaur, beste behin ere, harrera beroa egingo dio Sadarrek, oso estimatua baita zaleen artean.

Osasunak etxean jokaturiko azken bederatzi partidak irabazi ditu, eta gaur marka berri bat ezar dezake, hamargarren garaipena kateatuta. Edonola ere, Arrasateren aburuz, «hiru puntu gehiago» lirateke, eta helburua «54 puntura iristea da, besterik gabe». Gainera, teknikaria ez da Nasticez fio: «Gauzak oso zail jarriko dizkigu. Bolada onean dago, orain dela bi aste Deportivoren zelaian berdindu zuen. Gure bertsiorik onenaren beharra izango dugu garaipena lortu ahal izateko».

Bost jokalari faltako dituzte gaur nafarrek: min hartuta daude Lillo, Barja, Perea eta Rober Ibañez, eta zigortuta dago Villar. Edonola ere, Arrasate «ziur» dago hamaikako «lehiakorra» zelairatu ahalko duela. Deialdian sartu ditu harrobiko Irigoien, Moncayola, Oroz eta Barbero; azken biak, aurrenekoz. Bestalde, bueltan da Ruben Garcia, lesio baten ondorioz Numantziaren eta Zaragozaren aurkako partidak galdu ostean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna