Noiz sortua: 2019-05-15 00:30:00

Udal eta foru hauteskundeak. Bizkaia

Ezkerraldea. Arrain saltegian laprast

Unai Rementeria hautagai jeltzalearen txio bat baliatu dute zenbait alderdik Ezkerraldeko egoera sozioekonomikoa kanpainaren erdigunean jartzeko.
Teresa Laespada, atzo, Sestaon, PSE-EEko beste zenbait hautagairekin.
Teresa Laespada, atzo, Sestaon, PSE-EEko beste zenbait hautagairekin. BERRIA

Gotzon Hermosilla -

2019ko maiatzak 15

Lasai antzean zihoan kanpaina Bizkaian, beharbada herrialde horretan ezusteko handirik aurreikusten ez delako, eta, bat-batean, dena aztoratu du Unai Rementeria EAJren ahaldungai nagusiak sare sozialetan hedatutako mezu batek. Andoni izeneko arrain saltzaile barakaldar batez ziharduen Rementeriak mezu horretan: 04:00etan altxatu, goiz osoan arrain dendan aritu, eta bazkalostean beste lan batean jarduten omen da, 22:00ak arte. «Ez da kexu, ez du laguntzarik eskatzen», zioen Rementeriak bere txioan. Eta Andoni delakoa Andoni Artiz da. «Bizitzeko ari naiz», erantzun dio SER irrati katean Rementeriari. Kritikak leku guztietatik iritsi zaizkio hautagai jeltzaleari; bereziki, Ezkerraldean.

Udal eta foru hauteskundeetara aurkezten diren alderdiak ahalegin berezia egiten ari dira Ezkerraldean, eskualde horretan boto asko daudelako jokoan —175.000 inguru; bost bizkaitarretik batek han ematen du botoa—, eta krisiak, lan baldintza eskasek eta prekaritateak bereziki zigortutako aldea delako. Ezkerraldeko hautagaiek eta hauteskunde ekitaldiak bertan egin dituzten alderdiek hizpide izan dituzte Rementeriak adierazitakoak.

Bizkaiko Aldundiko buru izateko PSE-EEk aurkezten duen hautagaiak, Teresa Laespadak, Sestaon (Bizkaia) egin du agerraldia, eta «Bizkaiko sozialismoaren sorterri» den herritik kritikatu du Rementeriaren mezua, «prekaritatea eta lanaldi bikoitzak txalotu» egiten dituelakoan. «Nazionalistek ez dute enplegu duinik nahi; gu isilik egotea nahi dute, protestarik ez egitea, XIX. mendera itzultzea», esan du.

Laguntzen inguruan Rementeriak egindako aipamena ere ahotan hartu du Laespadak: «Zer arazo du EAJk horrekin?», galdetu du, eta gogorarazi du langileek «administrazioaren babesa eskatzeko» eskubidea dutela «bizi baldintzak duinak ez direnean».

Laespadak esan duenez, Bizkaiak zorra du Sestaorekin eta Ezkerraldearekin, «Ezkerraldeko langileei esker delako Bizkaia den bezalakoa». Hala ere, Laespadak uste du eskualdeko eta, orobat, Bizkaiko iragan industriala «ostentzeko» asmoa badagoela; «ez dugu gure iragana ezkutatu behar; lan egin behar dugu industriak pisu ekonomikoa berreskura dezan».

Laespadak gogora ekarri du Sestao dela langabezia tasarik altuena duen Bizkaiko herria; hala ere, esan du «harro» dagoela Bizkaiko Aldunditik —Enplegu, Gizarteratze eta Berdintasun Saileko buru da Laespada— langabeziaren kontra egin duten lanaz: «6.000 herritarri lagundu diegu lan merkatuan sartzen».

Barakaldoko PSE-EEren alkategai Alfredo Retortillok ere ez du aukera galdu Rementeriaren hitzak kritikatzeko: «Jende horrek lan eta negozio baldintza duinak behar ditu», esan du. «04:30ean altxatzea eta pertsiana 22:00etan jaistea ez da eredu jasangarria».

Bi eredu

EH Bilduk ere Ezkerraldean izan du hauteskunde ekitaldia, Santurtzin, eta han Bea Ilardia ahaldungai nagusiak Rementeriaren adierazpenak baliatu ditu EAJren eredua eta EH Bilduk eskaintzen duena alderatzeko. «Guk proposatzen dugun Bizkaian langileek eskubideak dituzte, ez dira esklaboak; guk proposatzen dugun Bizkaiak langile guztien eskubideak eta pertsona guztien ongizatea bermatzen ditu», esan du.

Ilardiaren ustez, datozen hauteskundeetan «Rementeriaren prekaritatearen eredua edo EH Bilduk ordezkatzen duen Europa moderno eta aurreratuaren eredua» hautatu behar da.

EH Bilduren ahaldungai nagusiaren arabera, Bizkaiak «nahikoa baliabide» baditu Europako herrialderik aurreratuenen pare jartzeko. «Anbizio eta borondate politiko kontua da», erantsi du, «EH Bilduk baditu gogoa eta indarra aurrera egiteko pertsona guztien eskubide sozial eta ekonomikoak hobetzeko bidean».

EH Bilduren koordinatzaile nagusi Arnaldo Otegik ere parte hartu du Santurtziko ekitaldian, Miren Matanzas alkategaiarekin batera, eta koalizioak Ezkerraldeari ematen dion balioa nabarmendu du. «Ezkerraldea gabe ez dago Euskal Errepublika eraikitzerik», esan du.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 29an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan lau pertsona hil dira COVID-19 gaitzaren eraginez, 22 positibo atzeman dituzte PCR probekin, eta bi gaixo ospitaleratu dituzte. Euskal Herrian 29.107 gaixok eman dute positibo guztira, koronabirusa atzemateko probaren bat eginda. Horietatik 2.056 hil dira. Grafikoak, albiste barruan.

Araban, Bizkaian eta Gipuzkoan Lanbide arduratuko da errenta berria banatzeaz. ©JUAN CARLOS RUIZ / FOKU

Iritsi da bizitzeko gutxieneko diru sarrera, muturreko pobrezia murrizteko

Irune Lasa

Espainiako Gobernuak diru saria onartu du, eta ekainean bertan hasiko da ordaintzen. Hegoaldean, Eusko Jaurlaritzak eta Nafarroako Gobernuak kudeatuko dute

Haur bat, jolas parke baten ondoan, Zarautzen. / ©Gorka Rubio, Foku

Espainiako Gobernuak eguneko udalekuak baimenduko ditu hirugarren fasean

Jon Ordoñez Garmendia

70 urtetik gorakoentzako ordutegiak desagertu egingo dira. Gehienez hogei pertsona elkartu ahal izango dira, baina ezingo da probintziatik atera oraindik.

Donostiako Zurriola hondartza, atzo. ©Gorka Rubio / FOKU.

Murgak dio ezin direla errepikatu hondartzetan ikusi diren irudiak

Maddi Ane Txoperena Iribarren

Jendea ez pilatzeko eta hondartzak modu «dinamikoan» erabiltzeko eskatu du Eusko Jaurlaritzako Osasun sailburuak. Era berean, galdegin du aisialdirako bada ez erabiltzea garraio publikoa «jende asko dagoenean».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna