Dena dago prest Emakume Master Cup hasi eta frontoiak betetzeko

Igandean hasiko da Eskuz Binakako Txapelketako bigarren ekitaldia, Gasteizen. Bi mailatan banaturik, denera 50 bikote lehiatuko dira
Txapelketako antolatzaileak, babesleak, pilotariak eta epaileak, atzo, Gasteizko udaletxean, aurkezpenean.
Txapelketako antolatzaileak, babesleak, pilotariak eta epaileak, atzo, Gasteizko udaletxean, aurkezpenean. IÑIGO URIZ / ARP

Kerman Garralda Zubimendi -

2018ko otsailak 1
Pixkanaka-pixkanaka ari da sendotzen Emakume Master kopa. Igande honetan hasiko da Binakako Txapelketaren bigarren ekitaldia. Ehun pilotarik hartuko dute parte, iaz baino 20 gehiagok. 50 bikote izango dira, Promozio eta Lehen Mailan banatuta. «Emakumezkoen pilota oraindik egonkortu gabe dagoenez, kantitateari garrantzi handiago eman diogu kalitateari baino», azaldu zuen atzo Iker Amarika antolatzaileak, Gasteizko Udaletxean egindako aurkezpenean. Promozio mailan 42 bikote ariko dira, eta, Lehen Mailan, zortzi.

Igandean ekingo diote lehiari guztiek. Mendizorrotzako frontoietan, goiz eta arrats, egun guztiko jaialdia antolatu dute; lehen kanporaketan, promozio mailan, hiru bikotez osatutako multzoak eratu dituzte. Denek denen aurka jokatu beharko dute, eta bi bikote onenek aurrera egingo dute. Lehen Mailan, berriz, bi laukote osatu dituzte, eta hiru onenek egingo dute aurrera. «Bikote guztiek, gutxienez, bi partida jokatzea nahi genuen, esperientzia horren motza izan ez dadin».

Hurrengo kanporaketak Bizkaian izango dira: hilaren 17an edo 18an Markina-Xemeinen, martxoaren 3an edo 4an Larrabetzun, eta martxoaren 10ean edo 11n Zamudion. Finalerdiak, martxoaren 18an izango dira, Oñatin (Gipuzkoa), eta finala, martxoaren 25ean, Eibarko Astelena pilotalekuan. «Historikoa izango da, sekula ez baitute esku-huskan jokatu emakumeek Astelenan».

Partidak hemezortzi tantora izango dira, eta pilota goxoarekin ibiliko dira. «Bikote batzuek eskatu izan dute pilota mistoak jartzeko, baina jendea errazago anima zedin, pilota goxoak bakarrik egongo dira». Edonork eman zezakeen izena, eta Araba, Bizkai, Gipuzkoa, Nafarroako eta Euskal Herritik kanpoko hainbat tokitako pilotariek hartuko dute parte. «Nabarmentzeko bikote asko osatu dira aurtengoan». Irabazleek garaikurra, txapela, babesleek eskainitako otarrea eta 200 euro irabaziko dituzte. Iaz Leire Etxaniz-Olatz Arrizabalagak irabazi zuten. Etxaniz lau eta erdikoan ere nagusitu zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Kerman Garralda Zubimendi

Informazio osagarria