Boscacci eta Antonioli, ezusteko garaileak Pierra Mentan

Unai Ugartemendia -

2018ko martxoak 20
Bere bosgarren garaipena izan behar zuenaren azken maldan behera murgilduta zegoen. Azken jaitsiera eta helmuga hor zituen. Baina ez, azkenaldian Kilian Jornetek ez du zortea bere alde, eta, erorketa baten ondorioz, peronea hautsi zuen, eta ez zuten garaipena lortu. Mendi eskiatzaileen Tourtzat hartzen da Pierra Menta (Areches-Beaufort, Alpeak, Frantzia). 33. ekitaldia izan du aurtengoa. Ez da nolanahiko proba: lau egunekoa; 10.000 metroko desnibel positiboa; une askotan 2.500 metrotik gora; eta 200 bikote baino gehiago lehian. Zale sutsuak dituen proba da, gainera, eta maldarik gogorrenetan ere jende andana izaten da lasterkarien gozamenerako.

Larunbatean amaitu zen 33. ekitaldiak azken sailkapenean izan zuen ezustekorik handiena: denen ahotan zegoen bikoteak, Kilian Jornetek eta Jakob Hermannek osaturikoak, ez zuen irabazi. Lehen egunean bigarren amaitu zuten, baina hurrengo bi egunetan irabazi egin zuten, eta laugarren egunean ere aurretik zihoazen; dena alde zutenean, ordea, kataluniarraren erorketak Michele Boscacci eta Robert Antonioli italiarrei eman zien azken garaipena. Bigarren postua, berriz, William Bon Mardion eta Xavier Gachet frantziarrentzat izan zen. Euskal Herriko parte hartzaileen artean Pantxo Saint Martin senpertarra izan zen lehen euskal herritarra, 25. postuan, Antoine Rodriguez frantziarrarekin bikotea osatuz.

Emakumezkoetan pronostikoak bete ziren: Axelle Mollaret frantziarrak eta Katia Tomatis italiarrak osatutako bikoteak ez zien aukerarik eman aurkariei. Lau etapetatik hiru irabazi zituzten. Emelie Forsbergek eta Laetitia Rouxek osatutako bikotea izan zen bigarren. Oso erregularrak izan ziren lau egunetan: bigarren aurreneko hiru egunetan eta garaile laugarrenean.

Euskal Herriko emakumeen artean onena, berriro ere, Nahia Quincoces mendexarra izan zen: bederatzigarren, Marta Riba kataluniarrarekin batera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna