Zaintza ikusgarri egin nahi dute sindikatuek martxoaren 8an

Bat egin dute greba feministarekin. Sistema «kapitalista eta heteropatriarkalaren» ordez, «bizitza erdian duena» aldarrikatuko dute. Bideoa albistearen amaieran.
Garbiñe Aranburu eta Leire Txakartegi, atzo, Bilbon, deialdia erregistratu aurretik.
Garbiñe Aranburu eta Leire Txakartegi, atzo, Bilbon, deialdia erregistratu aurretik. MARISOL RAMIREZ / FOKU

Ibai Maruri Bilbao -

2019ko otsailak 7
Mugimendu feministak Emakumeen Nazioarteko Egunerako antolatu duen grebarekin bat egin du gehiengo sindikalak. ELAk, LABek, ESK-k, Steilasek, EHNEk, Hiruk, CGTk eta CNTk atzo erregistratu zuten martxoaren 8rako andreen 24 orduko greba, Eusko Jaurlaritzaren eta Nafarroako Gobernuaren Bilbo eta Iruñeko bulegoetan. «Greba berezia da, enplegutik haragokoa. Zaintza lanak erdigunera ekarri behar dira, dagokien balioa emateko», ohartarazi zuen Leire Txakartegi ELA sindikatuko genero berdintasunerako arduradunak.

Dena den, zehaztu zuen lan munduan bertan ere badituztela greba egiteko arrazoiak. Haren esanetan, emakumeek bereziki jasaten dituzte prekarizazioa eta diskriminazioa. «Gogoratu behar dugu oraindik ere Hego Euskal Herrian %24koa dela soldata arrakala». Horregatik, Euskal Herriko andreak «etxean zein lantokian planto» egitera deitu zituen.

Iazkoaren arrastoa

LAB sindikatuko idazkari nagusi Garbiñe Aranburuk adierazi zuen «indarrean dagoen sistema kapitalista, heteropatriarkal eta kolonialistaren» aurkako greba feminista izango dela, «bizitza erdigunean» jarriko duen beste eredu baten aldekoa.

Iazko grebak utzitako arrastoari ere erreparatu zion Aranburuk. Uste du «bultzada berezia» izan dela sektore feminizatuetan piztu diren borroka sindikalentzat. Ugaritu egin direla azpimarratu zuen. «Greba honekin, langile subjektuaren berrosaketan pauso bat eman nahi genuke; askotarikoa da, baina guztien borrokak kolektibizatu behar ditugu, eta guztiok elkartzea beharrezkoa da».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna