Albistea entzun

ANALISIA

Baimenak, dirua dagoenerako

Maite Asensio Lozano -

2016ko otsailak 28

Seme-alabarik dutenek badakite haurren zaintzan lehen hilabeteetan hartutako ohiturek eragin handia dutela hurrengo urteetako jardunean. Ekuazio logikoa da: emakumeek hamasei asteko amatasun baimena izanda —bikotekideek bikoa—, haiek igarotzen dute denbora gehien jaioberriekin, eta haiek bihurtzen dira aditu zaintzan, haurren negarrak eta keinuak interpretatzen, pixoihalak aldatzen biberoia berotzen den bitartean... Hartara, gerora, haiek agertzen dute erresistentzia gutxiago umea zaintzeko bikotekideetako batek lanaldia murriztu behar duela planteatzen denean: logikoa baita, amak ezagutzen baitu hoberen haurra. Hortik dator emakumeak pobretzea, andre askok ibilbide profesionala baztertzea, eta ondorengoak.

Emakume eta ama ona izateko agindu patriarkala elikatzen du gurasotasun baimenen arteko aldeak, egun inoiz baino gehiago. Izan ere, gizartearen hainbat esparrutako diskriminazio formalak desagertzen ari diren bitartean, seme-alaben zaintza andreen ardurapean geratzera behartzen du legeak, amatasun eta aitatasun baimenak ez parekatuz.

OCDE Ekonomia Lankidetza eta Garapenerako Erakundeak berak onartu du haur bat jaiotzen denean indartzen direla genero rolak bikotean. Baina bikotea banatu ostean epaitegiek ezarritako zaintza partekatua hainbeste goratzen den aldiotan, harritzekoa da inor gutxik —ezta seme-alaben hazkuntzan eginkizun aktiboa izan nahi dutela dioten gizonek ere— ez aldarrikatzea zaintza partekatzeko modu eraginkorrena haurraren bizitzaren hasieran erantzukizunak konpartitzea dela, eta horretarako ezinbestekoa dela jaioberriekin denbora material kalitatezkoa igarotzea.

Martxo erdialdean «aitatasun eraldatzaileei» buruzko jardunaldi batzuetan parte hartuko dute Eusko Jaurlaritzako zenbait ordezkarik, tartean Iñigo Urkullu lehendakaria bera. Haurren hezkuntza prozesuan gizonen parte hartzea zein inportantea den nabarmenduko dutenean, gogora ekartzekoa izango da asteon galdutako aukera: gurasotasun baimenak parekatzeko proba egitasmo bat abiatzeari uko egin dio Eusko Legebiltzarrak, EAJ, PP eta UPDren botoekin.

Aldiz, eskari bat egin diote Espainiako Gobernuari: eredua berraztertzeko, eta baimenok parekatzeko pausoak emateko. Hori bai, «egoera ekonomikoak ahalbidetzen duenean». Auzia ez da berria: Espainiako Kongresuak 2011n onartu zuen aitatasun baimenak luzatzen hastea —hala agintzen du 2007ko Berdintasun Legeak—, baina neurriaren aplikazioa atzeratzen ari da gobernua urtetik urtera, dirurik ez dagoela argudiatuta. Eta hor dago koska: berdintasunaren diskurtso politikoki zuzenean geratzen diren politikariek ez dutela sinesten emakumeen eskubideak egiaz eskubide direnik, luxutik hurbilago dauden eskakizunak baizik. Izan ere, dirua dagoenean gauzatzeko uzten direnak kapritxoak dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA
12 eta 17 urte bitartekoak hasiko dira indartze dosia hartzen. ©GUILLAUME FAUVEAU

Neurriak arintzeko egutegia aurkeztu du Frantziako Gobernuak

Oihana Teyseyre Koskarat Gotzon Hermosilla

Telelana arinduko dute, eta maskara ez da derrigorrezkoa izanen aire zabalean. Aldaketa gehienak otsailean sartuko dira indarrean
Viceko La Sinia ikastetxeko haur batzuk ikasgelan. ©DANI CODINA

Herri mailako erantzun bat eskola segregazioari

Irati Urdalleta Lete

Kataluniako Hezkuntza Legeak udalei protagonismo handiagoa ematen die hezkuntzaren alorrean, esate baterako segregazioa kudeatzeko garaian. Vic hirian, adibidez, lortu dute ikastetxe guztiak, udala eta eragileak erronka horri aurre egiteko inplikatzea. Hala ere, aitortu dute badagoela zer hobetua.

Memoria historikoaren legeko okerra aitortu du Jaurlaritzak

Berria

Lege proiektua tramitatzean, beste testu bat igorri zuten. Hutsegite bat izan dela eta konponduko dutela diote

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.