Amaia Azkueren hiltzailea adingabeen zentrotik irten ahalko da, zaintzapean

Donostiako Adingabeen Auzitegiko epaileak erregimen erdi irekia onartu dio Amaia Azkueren hiltzaileari. 24 urte ditu egun A.E.-k, baina 17 zituenean hil zuen Azkue. Datorren hilean zazpi urte beteko ditu Zumarragako (Gipuzkoa) Ibaiondoko adingabeen zentroan. Epailearen arabera, gizonak bilakaera «positiboa» izan du gizarteratze programan. Espainiako Adingabeen Legearen arabera, zigorraren erdia betetakoan, zigortuak jarrera «ona» erakutsi badu, erregimena arindu dezake epaileak. Kasu honetan, hamar urteko itxialdia ezarri zioten. Zigorra betetakoan beste bost urtez egon beharko du zaintzapean aske.

Erabakia hartu aurretik, adingabeen epaileak Ibaiondoko psikologoen eta hezitzaileen txostenak aztertu ditu. Erregimen berriak zentrotik irteteko aukera emango dio Azkueren hiltzaileari. Besteak beste, ikasteko edo lan merkatura sartzeko aukera izan dezaten onartzen dute epaileek erregimena irekitzea. Baina izango ditu mugak: zentrotik irten ahalko da, baina aurrez zehaztutako jarduera jakin batzuk egiteko, eta betiere hezitzaile baten zaintzapean edo laguntzarekin.

2011ko martxoaren 16an hil zuen Amaia Azkue; 39 urte zituen emakumeak, eta Oriokoa zen. Azpeitiko (Gipuzkoa) Ibai Eder urtegian aurkitu zuten haren gorpua. A.E.-k 18 urte bete bezperan aurkeztu zuen bere burua polizia etxean, eta egindakoa aitortu. Adingabeen auzitegiaren esku geratu zen auzia. Epaitu zutenenerako adinduna zen arren, adingabeei dagokien zigorra betetzen ari da.