Zazpi espezialitatetara hedatu dute Osakidetzako hautaproben salaketa

Guztira hemeretzi dira LABek eta ESK-k salatu dituzten hautaprobak. EH Bilduk ikerketa batzorde bat sortzeko eskatu du legebiltzarrean
LAB eta ESK sindikatuetako ordezkariak, atzo, Bilbon.
LAB eta ESK sindikatuetako ordezkariak, atzo, Bilbon. MARISOL RAMIREZ / FOKU

Iosu Alberdi -

2018ko uztailak 24
LAB eta ESK sindikatuek beste zazpi espezialitatera hedatu dute Osakidetzako LEP lan eskaintza publikoetan egon daitezkeen irregulartasunak ikertzeko salaketa: kirurgia orokorra, otorrinoa, lan medikuntza, urologia, neurokirurgia, anatomia patologikoa eta traumatologia. Era horretan, hemeretzi dira sindikatuek susmopean jarri dituzten espezialitateak. Irregulartasunak estatistikoak eta azterketa egin duten pertsonei lotutakoak direla azaldu zuten atzo bi sindikatuetako kideek, EAEko Auzitegi Nagusian eginiko agerraldian.

Lehen salaketa ekainean aurkeztu zuten sindikatuek, hamabi espezialitatetako hautaproben aurka. Ordutik hona, ordea, informazio gehiago bildu dute, eta salaketa beste zazpira zabaldu. Frogen artean, testigantzak eta dokumentazioa aurkeztu dituztela adierazi zuten, «filtrazioak non gertatu zitezkeen» zehazteko balioko dutenak.

LABek eta ESK-k ez diote sinesgarritasunik eman Osakidetzak ireki duen barne ikerketari. «Ikertu nahi dena argitu beharrean, gordetzea gehiago bilatzen da», arrazoitu du LABeko ordezkari Jesus Oñatek. ESK-ko kide Patxi Nicolauk, berriz, Osakidetzak salatzaileen aurka hartutako jarrera kritikatu du.

«Amaierara arte»

EH Bilduk ikerketa batzorde bat eratzeko eskatu zuen atzo Eusko Legebiltzarrean. Proposamena aurrera ateratzeko adina babes izatea espero du koalizioak, eta Elkarrekin Podemosi eta PPri egin die deia, ez baitute uste EAJk eta PSEk batzordea sortzea onetsiko dutenik. Elkarrekin Podemosek ohar bidez adierazi du babestuko duela, eta «amaierara arte» iristeko asmoa azaldu du. PPk ere esan du «baliabide guztiak» erabiltzeko prest dagoela hautaprobetan zer gertatu den ikertzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna