Gurasoekin, eta etxean

Xua Gurasoekin Etxera ekinbidea jarri dute abian bi euskal presoren senideek eta lagunek, gurasoak haurrarekin batera aska ditzatela eskatzeko. Picassent kartzelan (Valentzia, Herrialde Katalanak) jaio zen Xua haurra, 2017an, orain arte han bizi izan da Olatz Lasagabaster amarekin —Patxi Uranga aita ere espetxe hartan da preso—, baina Xuak datorren urtarrilean 3 urte beteko ditu, eta Euskal Herrira ekarriko dute orduan, gurasoengandik bereizita. Gaur hamar urte kartzelatu zituzten Lasagabaster eta Uranga, ETArekin lotuta, eta, hamabi urteko ko,denaren hiru laurdenak beteta izan arren, preso daude oraindik ere, Euskal Herritik urruti. «Espainiako legediaren arabera, baldintzapean aske beharko lukete», adierazi dute taldeko kideek, Usurbilen (Gipuzkoa), prentsaurreko batean. «Banaketa benetan gogorra izango da». Ume txikiaren aitona-amonak ere izan dira agerraldian.

Familiaren egoera azaltzen duen aldizkari bat banatuko dute Usurbilgo eta Orioko herritarren artean. Horretaz gain, sinadura bilketa bat egingo dute, eta udal mozioak prestatuko dituzte.

Sare eta Jaiki Hadi

Nafarroako Sarek esan du espetxe politikan «korapiloak askatzeko garaia» dela: preso eriak, urruntzea, bakartzea, gradu progresioa... Udazkenean ekinbide berriak aurkeztuko ditu. «Irtenbide osatua eta adostua» nahi du.

Jaiki Hadi mediku elkarteak babesa agertu die 11/13 auziko kideei. «Kriminalizazioa» salatu du.