Leire Rodriguez senar ohiak hil zuela frogatutzat jo du herri epaimahaiak

Epaimahaiaren arabera, bainuontziaren kontra behin baino gehiagotan jo zuen, hiru orduz izan zuen etxean, eta autoaz zapalduta hil zuen
Leire Rodriguezen senar ohiaren aurkako epaiketako saio bat, joan den astean.
Leire Rodriguezen senar ohiaren aurkako epaiketako saio bat, joan den astean. LUIS JAUREGIALTZO / FOKU

Ibai Maruri Bilbao -

2018ko apirilak 17
«Leire Rodriguez nahita eta babesteko aukerarik utzi gabe hiltzeagatik akusatua errudun dela uste dugu». Hala eman zuen atzo ezagutzera herri epaimahaiaren bozeramaileak Leire Rodriguezen senar ohiaren aurkako epaiketa bukatutakoan aho batez hartutako erabakia. Bizkaiko Probintzia Auzitegiko epaileak ezarriko dio zigorra orain. Fiskalak 23 urteko zigorra eskatu du, eta akusazio partikularrak —Rodriguezen familia—, 30 urteko espetxe zigorra eta hamar urteko zaintzapeko askatasuna. Baita sendiarekin eta seme-alabekin hartu-emana izateko debekua ere. 25 urteko espetxealdia eta hamar urteko zaintzako askatasuna eskatu du herri akusazioak. Espainiako Estatuaren abokatuak, 25 urteko zigorra. Defentsak zigor txikiena jartzeko eskatu dio epaileari.

Epaimahaia osatu duten bederatzi gizon-emakumeek frogatutzat jo dute bikotea banatu izana onartu ez zuelako erabaki zuela akusatuak emazte ohia hiltzea, eta horretarako hasieran beste gizon bati eskatu ziola laguntza.

Epaimahaiak frogatutzat jo du ondoko kontaketa. 2013ko abuztuaren 7an, 21:30ean akusatua Leire Rodriguezen etxera joan zen, «hura hiltzeko asmoz». Atea ireki zionean, ahoa eta sudurra estali zizkion eskuekin, eta komunera eroan zuen. Komunean, Rodriguezen buruari heldu eta behin baino gehiagotan jo zuen bainuontziaren kontra.

Auzitegi medikuaren lekukotza eta hark egindako autopsia erabili dituzte frogatutzat jotzeko Rodriguez kordea galduta geratu zela, eta horregatik ez dagoela bere burua defendatzeko ahaleginik egin zuen arrastorik. Epaimahaiak frogatutzat jo du hiru bat orduz eduki zuela Rodriguez alfonbra gainean kordea galduta. Autora jaitsi, eta ondoren hilotz agertu zen errepidera eroan zuen. Epaimahaiak frogatutzat jo du oraindik bizirik zegoela birritan igaro zela gainetik autoarekin.

Epaimahaiak ez du aringarririk onartu: frogatutzat jo du Rodriguezen hilketa ez zela beroaldi baten ondorio izan, eta ez zuela buruko arazorik banaketagatik. Frogatutzat jo dute genero indarkeria kasu bat izan dela, akusatuak ezkonduta zeudelako eta banatu ostean Rodriguezekiko izan zuen gehiegizko kontrolagatik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna