04/08 sumarioko fiskalak uko egin dio Otegik lekuko gisa deklaratzeko eskaerari

Jose Perals Espainiako Auzitegi Nazionaleko 04/08 sumarioko epaiketako fiskalak atzera egin du eta uko egin dio ezker abertzaleko kide batzuek lekuko gisa deklaratzeko berak egindako eskaerari. Datorren asteazken eta ostegunerako zeuden deituta Arnaldo Otegi, Joseba Permach, Rufi Etxeberria, Karmelo Landa, Joseba Alvarez, Jose Luis Elkoro eta Juan Kruz Aldasoro, ezker abertzaleko 35 kideren kontra Madrilen egiten ari diren epaiketan.

Atzoko auzi saioan eman zuen bere erabakiaren berri fiskaltzak, idatziz, eta ukatu egin zuen horrek zerikusia duenik hauteskunde kanpainarekin. Auzitegi Konstituzionalaren eta Gorenaren jurisprudentzian oinarrituta, azaldu du gisa bereko delituagatik inputatu eta zigortu dituztela zazpi pertsona horiek eta hori baldintzatuta deklaratuko luketela; gogoratu du haien lekukotzak 2010ean eskatu zituela, oraindik horietako inor inputatu gabe zegoela. Otegi Bateragune auzian zigortu zuten, eta preso dago;martxoan irtengo da. Besteak 05/35 sumarioko auzian zigortu zituzten iaz —Elkoro auzitik kanpo utzi zuten aurrez 18/98 auzian zigortu zutelako—.

Aurreko astean hasi zen epaiketa; hamarna urteko zigorrak eskatu dituzte, haien lan politikoarekin ETAri laguntzea leporatuta. Atzo deklaratu zuten Jon Garaik, Mikel Garaiondok, Antton Gomezek, Asier Imazek, Eusebio Lasak, Iñaki Olaldek, Aner Petralandak, Juan Joxe Petrikorenak, Joana Regeirok, Arantza Santestebanek, Patxi Urrutiak, Joseba Zinkunegik, Mikel Zubimendik eta Gorka Etxeberriak.