HILBERRIA. Jean-Michel Larrasket

Goi mailaren alde

GAIZKA IROZ

Nora Arbelbide Lete -

2018ko martxoak 20
Beti irri batekin ezpain bazterrean, «sinplea eta alaia», eta, aldi berean, lan egiteko «gaitasun eta jakitate biziki handi» batekin, «hedadura handiko gizona zen, beti zangoak lurrean ontsa pausaturik». Horrela gogoratzen du Michel Bidegainek Jean-Michel Larrasket (Paris, 1950). Baionako UIT Teknologia Institutu Unibertsitarioan 25 urtez lankide eta adiskide min izan zuen. «Goizegi» hil dela damutzen da Bidegain, oraino «zer egin eta zer erran» baitzuen. 67 urterekin zendu zen atzo Larrasket, minbiziak eramanik.

Gaur, etxean egiten ahalko dira bisitak, Lachepaillet harresiko hiribidean, Baionan. Bihar, berriz, 18:00etan Amestoian izango da hitzordua, Benjamin Gomez etorbidean, Baionan hori ere. Baiona aspaldiko bizitokia zuen Larrasketek, baina Parisen sortua zen. Aita-amak barkoxtarrak, euskara galdurik, berriz ikasten aritu zen. Ikasi, eta ikasteko aukerak eman, hori izan zen bere biziko ardatzetako bat; Euskal Herrian bertan, mugaz gaindiko perspektibarekin. Bereziki Lapurdin goi mailako ikasketen garapenaren alde aritu zen. Orduan zuen aurkitu Beñat Oihartzabal goi mailako ikerlari, doktoratu eta euskaltzaina. Adiskidetu ziren laster. «Entseatzen baitzen Baionan unibertsitateko adar bat sortzera. Eta hondar arte amets hori atxiki du», gogoratu du Oihartzabalek. Goi mailako ikasketen garapena garrantzitsua zitzaion Larrasketi: «Iruditzen baitzitzaion beharrezkoa zela horrelako zerbait hemen, garapen sendo bat izateko». Lurraldearen garapenaren alde, eta «hemengo gazteria hemen finkatzeko ahal bezain bat».

Katedratikoa zen kudeaketa zientzietan. Baionako Unibertsitateko irakasle emeritu izateaz gain, Mondragon Unibertsitateko irakasle atxikia izan zen Enpresa Fakultatean, eta irakasle jardun zuen Bidarte eta Miarritzeko ESTIA, Industria Teknologia Aurreratuetako Goi Eskolan. ESTIA eta Mondragon Unibertsitatearen arteko mugaz gaindiko elkarlana hark zuen abiarazi, hain zuzen. 2012an izendatu zuten Eusko Ikaskuntzako Ipar Euskal Herriko lehendakari. «Orduz geroztik, lan handia egin izan du Iparraldean Eusko Ikaskuntza erreferente izateko, nazioarteko proiektu ugari abian jarriz», oroitu dute Eusko Ikaskuntzakoek.

Eticoop lurralde ekintzailetza sustatzeko elkartearen sortzaileetako bat izan zen. Elkarteak prestakuntza, aholkularitza eta finantzaketa eskaintzen die lurralde garapeneko proiektuei. Baionako erietxearekin ere lan bat eraman zuen, ikertzeko ospitalearen kudeaketa eta bizia nola hobe zitekeen: «Bere ikerketak eta irakaskuntza beti tokian tokiko errealitateari lotzea izan da bere ardura», gogoratu du Bidegainek. Tesi anitz ere zuzendu zituen; hor ere beti arrangura berarekin: «Tesi horiek izan zitezen hemengo garapenean baliagarri».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna