Urrengoetxea hiltzeagatik epaitutako adingabeari sei urteko zigorra ezarri diote

Iazko abenduan hil zuten Ibon Urrengoetxea, Bilbon. Kasu hartan identifikatutako adingabea ez dute epaitu, 13 urte izateagatik
Urrengoetxearen hilketa salatzeko, Zornotzan eginiko protesta.
Urrengoetxearen hilketa salatzeko, Zornotzan eginiko protesta. M. RAMIREZ / FOKU

Amaia Ramirez de Okariz -

2018ko irailak 12
Sei urteko erregimen itxia eta hiru urteko zaintzapeko askatasuna ezarri diote Ibon Urrengoetxea Urren zornotzarraren hilketarengatik epaitu duten 16 urteko adingabeari, El Correo egunkariak jakinarazi duenez —auzitegietako iturriek ez dute egiaztatu, akusatuak adingabeak izaki, haiei buruzko informaziorik ezin dutelako eman—. Iazko abenduaren 23an izan zen jazoera, Bilbon: bi adingabek eraso egin zioten Urrengoetxeari; lapurreta baten biktima izan zen, Nafarroa kalean. Aurre egin zien erasotzaileei, eta haiekiko liskarrean, lurrera erori, eta hil egin zen, buruan kolpe bat hartuta.

13 urte besterik ez du gertaera horren ondorioz identifikatu zuten beste gazteak, eta, horregatik, ezin izan dute epaitu. Hala ere, uztailaren 19an Bilboko Adingabeen Epaitegian egin zen ahozko ikustaldian egon zen.

Urrengoetxearen hilketak kezka handia eragin zuen Bilboko gizartean, eta sentipen hori areagotu egin zen handik egun batzuetara, Otxarkoaga auzoan 87 urteko senar-emazte batzuk hil zituztenean. Hain zuzen, krimen horretaz akusatutako hiru adingabeen aurkako epaiketa bihar hasiko da.

Urtarrilaren 18an hil zituzten senar-emazteak, etxean lapurtzera sartu zirenean. Ertzaintzak azaldu zuenez, gorpuek indarkeria zantzuak zituzten. Hiru gazte atxilotu zituzten hilketekin lotuta, hirurak adingabeak. Fiskalak seina urteko zigorra eskatu du 14 urteko bi gazteentzat, bi hilketak eta lapurreta leporatuta; 16 urteko gaztearentzat, berriz, hamalau urteko zigorra eskatu du, hilketen bultzatzailea izatea egotzita.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna