FARCek ez du parte hartuko presidentetzarako bozetan

BOGOTA. Rodrigo Londoño Timochenko zen FARC Herriaren Indar Alternatibo Iraultzailea alderdiaren hautagaia Kolonbian datorren maiatzaren 27an egingo dituzten presidentetzarako bozetarako. Baina bihotzean ebakuntza egin berri diote, eta hori dela eta hautagaia izateari uko egin dio.FARCek ez du beste hautagairik proposatuko, oraindik ere horretarako denbora duen arren. Horren berri eman zuen, hain zuzen, atzo, Luciano Marin Ivan Marquez alderdiko bigarrenak.

Kolonbiako Gobernuarekin bake akordioa sinatu eta gero, FARC — Kolonbiako Indar Armatu Iraultzaileak zena— pasa den irailean bilakatu zen alderdi politiko. Marquezek atzo salatu zuen «zailtasunak» izan dituztela haien jarduera aurrera eramateko, eta, hori izan dela hautagaitza bertan behera uzteko beste arrazoia. Legebiltzarrerako hauteskundeak etzi egingo dituzte, eta gogoratu zuen kanpaina eten zutela, Timochenkori harriak eta arrautzak bota zizkiotelako herrialdeko hiru tokitan, gutxienez.