Abian da aurretiazko botoa azaroaren 18ko galdeketetan

DONOSTIA. Azaroaren 18an etorkizun politikoari buruzko galdeketak egingo dituzte Donostian, Irunen (Gipuzkoa), Zallan, Balmasedan eta Alonsotegin (Bizkaia), eta herritarrek aldez aurretik botoa emateko aukera dute atzotik. Donostian, 150.000 lagun inguruk izango dute botoa emateko eskubidea, eta hala egin zuten atzo zenbait herritarrek.

Azaroaren 18an 37 hautesleku zabalduko dituzte Gipuzkoako hiriburuan, eta horietan jarriko dituzten hautetsontziak aurkeztu zituen igandean Gure Esku Dago erabakitzeko eskubidearen aldeko dinamikak. Aquariumean eginiko ekitaldi batean erakutsi zituzten hautetsontziak, eta bertan izan ziren Andoni Etxebeste EAJko Gipuzko Buru Batzarreko kidea eta Arkaitz Rodriguez Sortuko idazkari nagusia, hiriko eragile politiko, sindikal eta sozial ugaritako ordezkariez gain. Aquariumera heldu aurretik, kalejiran joan ziren Alde Zaharretik.

Galdeketak «garrantzi handiko ariketa» izango direla nabarmendu zuten Maria Mungia eta Ibon Rosales bozeramaileek, eta azaldu «gaitasun tekniko, ekonomiko eta kolektibo izugarria» eskatzen duela: «Pauso esanguratsua eta eraginkorra dela uste dugu, aurrera begira sor daitezken agertokiei begira». Gogorarazi zuten 1.000 bat boluntario behar dituztela azaroaren 18an, eta bat egitera deitu zituzten herritarrak: «Erabakiaren bidean mugarri garrantzitsu bat jartzera goaz».

[youtube]https://youtu.be/qrCFkcy5yqI[/youtube]