Bi lagun hil dituzte labankadaz Finlandian
HELSINKI. Gizon batek bi pertsona hil eta beste sei zauritu zituen atzo arratsaldean, labankadaz, Finlandia hegoaldean dagoen Turku hirian. Erasoa gertatu eta minutu batzuetara, polizia batek erasotzaileari hankan tiro egin zion, eta, ondoren, atxilotu. Paula Risikko Finlandiako Barne ministroaren arabera, segurtasun indarrek ez dute eraso «terroristatzat» hartu oraingoz, «nahiz eta ikerketaren norabidea edozein momentutan alda daitekeen». Poliziak hilketak gertatutako lekua jendez hustu zuen, eta herritarrei eskatu zien ez hurbiltzeko. Horrez gain, agintariek Helsinki-Vantaa aireportuan segurtasun neurriak indartu zituzten. Bestalde, erasotzaileak laguntzaile bat izan zezakeelakoan, herritarrei eskatu zieten informaziorik izanez gero segurtasun indarrekin harremanetan jartzeko.
Iruzkinak
Ez dago iruzkinik
Ordenatu