Euskal Eskola Publikoaren jaia hartzeko prest da Errenteria

ERRENTERIA.Makina bat taupada leloa izango du aurten Euskal Eskola Publikoaren jaiak. Ekainaren 2an egingo da, Errenterian (Gipuzkoa). Bihotzak berezkoa duen martxari erreparatu nahi diote, eta Errenteriaren iragan industrialari. Atzo, Errenteriako Koldo Mitxelena ikastetxeko jolastokian agerraldi bat egin zuten egitaraua prest dela jakinarazteko. EHIGE Euskal Herriko Ikasleen Gurasoen Elkarteko koordinatzaile Lurdes Imaz, eskolako guraso Maialen Oliveri, herriko alkate Julen Mendoza eta Porrotx pailazoa mintzatu ziren. Herriarentzat egun aski garrantzitsua izango dela onartu zuten. Sei gunetan banatuko dute Errenteria jairako, eta askotariko ekintzak egongo dira, adin tarte guztiak asetzeko modukoak.