Alessandro De Marchik irabazi du etapa Espainiako Vueltan

Pinotek hamabi segundo atera dizkie faboritoei, eta Aruk 41 segundo galdu ditu. Laugarren da Ion Izagirre

Berria -

2018ko irailak 6
TXIRRINDULARITZA. Alessandro De Marchik (BMC) neurria hartua dio Espainiako Vueltari. Lau garaipen lortu ditu profesionaletan, eta horietatik hiru lasterketa horretan eskuratu ditu. Azkena, atzo, 11. etapan. Italiarrak etapa perfektua egin zuen. Lehenik, eguneko ihesaldian sartu zen; ondoren, aurrera egin zuen Jhonatan Restreporekin (Katuxa) azken kilometroetan; eta azkenik, kolonbiarra atzean utzi, eta bakarrik helmugaratu zen. Bi minutura iritsi zen faboritoen taldea.

Thibaut Pinot izan zen eguneko beste protagonista. Ihesaldian sartu zen, eta kilometro askoan lider izan zen behin-behinean, hiru minuturen aldea izan baitzuen faboritoen tropelarekin. Azken kilometroetan, ordea, hustu egin zen, eta helmugan, hamabi segundoren aldea besterik ez zuen lortu. Eguneko galtzailea, berriz, Fabio Aru (UAE) izan zen, faboritoengandik 41 segundora helmugaratu baitzen. Askoz galera txikiagoa izan zuen Emanuel Buchmanek (Bora), zortzi segundorena, baina nahikoa izan zen Ion Izagirrek (Bahrain) postu bat egin zezan gora sailkapen nagusian. Laugarren da ormaiztegiarra.

Etapako lehen euskal herritarra, hala ere, Mikel Bizkarra (Murias) izan zen. Eguneko ihesaldian sartu zen maƱariarra, eta 11. izan zen, irabazlearengandik 1.52ra. Beste behin oso adi aritu ziren Muriasekoak.

MondoƱedo eta Estaca de Baresko itsasargi artean jokatuko da gaur 12. etapa, 181 kilometrokoa. Bi mendate igoko dituzte, hirugarren mailakoak biak: bata, hasieran, eta bestea, 50 kilometro falta direla.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria