Aspergerren sindromearen diagnostikoan, aurrera urratsa

IRUÑEA. Aspergerren sindromea hobeto diagnostikatzeko aurkikuntza bat egin dute Nafarroako Unibertsitatea klinikan; horren bidez, sindrome hori eta komunikazio sozialerako nahasmendua doiago bereizteko gakoak eman dituzte. Nafarroako Unibertsitatea klinikako Neuropediatria Unitatean egin dute ikerketa, eta horren berri eman dute European Journal of Education and Psychology argitalpenean. Zehaztu dutenez, 254 paziente aztertu dituzte ikerketarako, adingabeak denak, 5-16 urte artekoak.

Aspergerren sindromeak eta komunikazio sozialerako nahasmenduak antzekotasunik badutela nabarmendu dute ikertzaileek, eta «ezberdintasunei» erreparatzeko ahalegina egin dutela, biak ondo bereizteko, tratamendua jartzeko orduan-eta ñabardurak bai baitira. Horiek horrela, egindako aurkikuntzen bidez, egokitu egin dituzte diagnostikoak egiteko erabiltzen diren testak.

Atzo izan zen Aspergerren sindromeari eskainitako nazioarteko eguna. Neurogarapenarekin lotuta dago. Sindrome hori dutenek, askotan, pentsamendu eta portaera «zurrunak» dituzte; errutinetara oso atxikita egoten dira, eta aldaketekin aztoratzeko joera dute. Espektro autistaren barruko nahasmenduekin lotuta dago, ezaugarri zenbaiti begira.