Tottenham Txapeldunen Ligako finalean, ezustean

2-0eko bat irauli du Ajaxen zelaian, eta 2-3 irabazi du; Lucas Mourak sartu ditu Tottenhamen hiru golak

Berria -

2019ko maiatzak 9
FUTBOLA. Tottenham-Liverpool. Horixe izango aurtengo Txapeldunen Ligako finala. Premier ligako bi talde dira, hortaz, finalean. Azken unean lortu zuen atzo sailkapena Tottenhamek, 95. minutuan, 2-0eko bat irauli eta gero. Lucas Moura izan zen Ajaxen borreroa. Hark sartu zituen Tottenhamen hiru golak.

Partida ondo hasi zen Ajaxentzat, bosgarren minutuan De Ligtek 1-0ekoa lortu baitzuen korner batean, buruz. Erreskadan berdinketako gola izan zuen oinetan Sonek, baina zutoinera badali zuen baloia. Ajax nagusi izan zen hurrengo minutuetan, eta kontraeraso batean bigarrena egin zuen. Ziyech izan zen golegilea, area ertzetik jaurtiketa oso on bat eginda.

2-0ekoarekin kanporaketak erabakita zirudien. Baina bigarren zatiko lehen ordu laurdenean bi gol sartu zituen Lucas Mourak (55. eta 59. min.), bata jaurtiketa gurutzatu batekin, eta bestea Onana atezainaren huts bat baliatuz. Hor aldatu zen lehia. Ajaxeko jokalariak lotuta jokatzen hasi ziren. Tottenhamek 87. minutuan izan zuen kanporaketa iraultzeko lehen aukera. Veltmanek gol arrastoan atera zuen Vertonghenen baloia. Baina 95. minutuan Lucas Mourak ez zuen huts egin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna