Seaskako ikasle guztiek gainditu dute brebeta

DONOSTIA. Seaskako ikasle guztiek, 179k, brebeta gainditu dute. Halere, zientzietan nota «biziki apalak» izan dituztela salatu dute. Izan ere, zientzietako azterketa euskaraz eta bretoieraz egin duten ikasleek zigorrak izan dituzte —zenbakiak bakarrik zuzendu dizkiete, eta ez erranaldiak—..

Hain justu, Ikastolen Elkarteak 2017-2018ko ikasturteko balorazioa egin zuen atzo, eta elkartearen kexa nagusia ere Frantziako Gobernuaren jokaera izan da: «Politika kolonialista eta suntsitzaile bortitz bati ekin dio hizkuntza gutxituen aurka». Ikasleek brebetan jasanikoaz gain, elkarteak salatu du Seaskako ikastolei irakasle gehiago izateko zailtasunak jarri dizkietela.

Eusko Jaurlaritzak aurkeztutako Hezkuntza Akordiorako proposamenaz, berriz, «gabeziak» dituela adierazi du elkarteak. Halere, «abiapuntu gisa» irudikatu nahi dute, hezkuntza lege berri baterako, «hezkuntza sistema propio bat eraikitzeko bidean». Hik Hasi egitasmoak aurkeztu zuen proposamena, ordea, «oso ontzat» jo dute ikastolek.