Angel Villacampak entrenatuko du Athletic

Teknikari espainiarrak bi liga eta kopa bat irabazi zituen Atletico Madrilekin. Txinan ari zen lanean

Aitor Elizegi, Angel Villacampa eta Joseba Agirre, atzo, aurkezpenean. ATHLETIC.
2019ko maiatzaren 24a
00:00
Entzun
FUTBOLA. Athletic oso urruti joan da Joseba Agirreren ordezkoa topatzeko; Txinara, hain zuzen. Han ari zen Angel Villacampa entrenatzaile espainiarra, hango 16 urtez azpiko emakumezkoen selekzioa entrenatzen. Baina talde zuri-gorriak ez du Villacamparen alde egin Txinan egindako lanagatik, baizik eta aurretik egindakoagatik. Izan ere, Villacampak bi urte eta erdiz entrenatu zuen Atletico Madril, 2016ko urtarriletik 2018ko ekainera. Espainiako taldeak emaitza bikainak lortu zituen hura aulkian zela: bi liga eta kopa bat. Beste bitan izan zen Kopako txapeldunorde. Bietan galdu zuen Bartzelonaren aurka.

Villacampak entrenatuta, Atletico Madrilek marka bikainak lortu zituen. 2016-17ko sasoian, adibidez, partida bakar bat ere galdu gabe izan zen txapeldun. 46 neurketa egon zen galdu gabe. Athleticek nabarmendu duenez, «oso entrenatzaile zorrotza da, eta gustuko du erasoko jokoa».

Entrenatzailea fitxatuta, erabakiak hartzen hasiko dira, eta horietan parte hartuko dute Joseba Agirre kirol zuzendariak eta Villacampak berak. Taldeak ez du oraindik sasoia amaitu. Datorren asteazkenean, adibidez, Euskal Herria kopako finalerdia jokatuko du Eibarren aurka, Galdakaon (Bizkaia), Santa Barbaran, 19:30ean. Bezperan, Realak eta Alavesek jokatuko dute lehen finalerdia, Arrasaten (Gipuzkoa), Mojategin, 19:30ean.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.