Soralucek ekoizpen planta berri bat ireki du Bergaran

BERGARA. Danobat taldeko Soralucek beste fabrika bat dauka Euskal Herrian, Bergaran, eta dagoeneko sei dira. Mondragon korporazioko makina-erreminta ataleko etxeak bederatzi milioi euroko inbertsioa egin du Bergaran Portal Factory zabaltzeko, belaunaldi berriko makina handiak egiteko lantegia. Neurri handiko piezak mekanizatzeko makinak egiten ditu Soralucek Bergaran, ekoizpenerako ahalmen handikoak. Portal Factoryk 9.000 metro koadroko azalera dauka, eta hamazazpi metroko altuera; 80 tona arteko pisua mugitzeko garabi bat hartzeko gai izan da, eta, horri esker, Soralucek urrats handi bat egingo du bere makinen neurriari dagokionez. Soraluceko zuzendari Rafael Idigorasek azaldu du inbertsio honekin «muturreko teknologiadun makinak egiteko beharrari» erantzungo diotela, industria gero eta gehiago eskatzen ari delako ahalmen handiko makinak. Dena den, Portal Factory ez da ekoizpen zentroa izango soilik, neurri handiko makinen ikerketa proiektuak garatuko baitira han, «neurri handiko mekanizatuan urrats gehiago egiteko».