Preso kurdu batek bere burua hil du protesta ekintza gisa

ANKARA. Turkiako Errepublikako espetxeetan preso zeuden lau militante kurduk beren buruaz beste egin dute astebeteko epean. Medya Cinar izan da azkena; atzo hil zuen bere burua, Mardingo espetxean, Kurdistanen. Hilaren 17an gertatu zen halako lehenengo suizidioa, eta iragan den asteburuan izan dira beste biak. Firat agentziaren arabera, guztien arrazoia izan da protesta egitea Abdullah Ocalan PKK Kurdistango Langileen Alderdiko liderrak Imraliko espetxean pairatzen duen bakartze egoeraren aurka.

Kurdistango hainbat eragilek halako suizidioak ez egiteko eskatu diete militante presoei; besteak beste, Ocalanen bakartzearen aurka gose greban ari den Leyla Guven parlamentariak —140 egun daramatza—.

Siriako Kurdistanen, berriz, iragan asteburuan EI Estatu Islamikoari menpean zuen azken eremua kendu ondoren, hango gobernu autonomoak eskatu du nazioarteko auzitegi bat eratu dadila EIko kideak epaitzeko.