Gizon bat atxilo adingabe bat bortxatzeagatik

Berria -

2018ko irailak 5
BAIONA. Frantziako Poliziak 70 urteko gizonezko bat atxilotu zuen abuztuaren 30ean, Limouxen (Okzitania), 6 urteko ume bat bortxatzea leporatuta. Erasoa Donibane Lohizunen (Lapurdi) gertatu zen, abuztuaren 27an. Baionako Fiskaltzak abuztuaren 31n abiatu zuen ikerketa. Salaketaren arabera, 70 urteko osaba zaharrak bortxatu zuen adingabea familiako bilera batean. Epaileak espetxera bidali du, adingabe bat intzestuzko sexu harreman batera behartzea egotzita.

Gasteizen, berriz, gaur hasiko da 2016an hamasei hilabeteko haur bat hil zuen gizonaren aurkako epaiketa. Herri epaimahaiko kideak aukeratu zituzten atzo. Haurra hiltzea eta haren ama hiltzen saiatzea leporatu diote; espetxealdi iraunkor berrikusgarria eskatu dute.

Hondarribian (Gipuzkoa), andre batek eraso matxista bat jasan zuen joan den ostiralean: bikotekideak jo egin zuen Zumardian. Erasoa salatzeko, elkarretaratze bat egin zuten bart iluntzean; Donostian ere bai, hirian asteburuko erasoa salatzeko. Udalak iragarri du segurtasuna indartuko duela Zurriolan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna