Lehen alea kaleratu du 'ZIGiZAGa' aldizkari digitalak

KULTURA. Azpeitiko (Gipuzkoa) Kulturaz kooperatibak ZIGiZAGa aldizkari digitala abiatu du, Dinamoa sormen guneko jarduna testuinguruarekin harremanetan jartzeko helburuz. Hausnarketarako eta eztabaidarako toki izan nahi duela azaldu dute arduradunek: «Sareko aldizkari forma badu ere, haratago joan nahi du; komunitatea gorpuzteko ahalegina da, leku bat ematekoa». Arantza Santesteban ariko da editore lanetan, eta urtean bi zenbaki aterako dituzte, bakoitzean gai nagusi bat ardatz hartuta eta hainbat eremutako jendearen parte hartzearekin. Lehen zenbakia sarean jarri dute jada—dinamoa.eus atarian irakur daiteke—, eta apokalipsia du hizpide. Sinadura hauek bildu dituzte: Ingrid Guardiola, Agustin Arrieta, Arrate Hidalgo, Nader Koochaki, Uxue Arzelus, Mikel Pejenaute, Jean-Gabriel Periot, Ernesto Cardenal, Xabi Borda eta Susan Sontag.