Cataldok irabazi du Italiako Giroko hamabosgarren etapa

TXIRRINDULARITZA. Dario Cataldorentzat (Astana) izan zen garaipena atzo Italiako Giroko hamabosgarren etapan, Mattia Cattaneo (Androni) iheskideari esprintean nagusituta. Eguneko bi ausartengandik 11 segundora helmugaratu ziren Simon Yates, Hugh Carthy (Mitchelton), Richard Carapaz liderra (Movistar) eta Vincenzo Nibali (Bahrain). Lau txirrindulari horiek aurrera egin zuten eguneko azken mendatean, Civiglion, eta aldea lortu zuten helmugan. Haiengandik 25 segundora ailegatu ziren Miguel Angel Lopez (Astana), Rafal Majka (Bora) eta Mikel Landa (Movistar), besteak beste. 40 segundora iritsi zen beste taldetxo bat, eta tartean ziren Bauke Mollema (Trek), Primoz Roglic (Jumbo), Pavel Sivakov (Ineos) eta Ilnur Zakarin (Katuxa).

Beraz, sailkapen nagusian, Carapaz sendotu egin da lehen postuan. Ekuadortarrak 47 segundo ateratzen dizkio Roglici, 1.47 Nibaliri, 2.35 Majkari, 3.15 Landari, 3.38ra Mollemari, 4.12 Jan Polanci (UAE), 5.24 Yatesi, 5.48 Yatesi eta 5.55 Lopezi.

Gaur ez da etaparik jokatuko, bigarren eta azken atseden eguna izango baita. Sei etapa falta dira, eta, sailkapen nagusia nola dagoen ikusita, lehia handia izango da. Carapaz da liderra, eta orain arte indartsuen aritu dena. Baina edozer gerta daiteke Veronara bidean.