Akusatuak kolpeka hil zuen Zadorran azaldu zen andrea
Eztabaida batean bere onetik irten eta mazo batekin jo zuela esan du gizonak bere kontrako epaiketan
GASTEIZ. Zadorra ibaian 2016an hilotz agertu zen andrazkoaren hilketa argitzeko epaiketan, hitza hartu zuen atzo delituaz akusatutako gizonak, eta lehendik egindakoa berretsi zuen: hilketa bere gain hartu zuen. Andrearekin —adiskidetasun harremana zuten— eztabaida bat izan zuela esplikatu zuen, bere onetik irten zela, eta kolpeka hil zuela: mazo batekin. Andreak 60 urte zituen, eta Marga izena zuen; ez da abizenik jakinarazi. Gizonak azaldu du bi egun egin zituela hilotzarekin zer egin ez zekiela asmatu ezinik, eta zatikatzea erabaki zuela ondoren. Pusketatan, Zadorra ibaira eraman zuen. Asteartean hasi zen epaiketa; fiskaltzak hogei urteko kartzela zigorra eskatu du, azpikeriaz egindako hilketa bat izan zela egotzita. Defentsak, homizidioa izan zela defendatu du, eta hainbat aringarri aintzat hartzea nahi du; besteak beste, gizonaren buruko nahasmendua. Nafarroako Gobernuak, bestalde, ebatzi du parte izango dela Natalya Balyuken hilketa argitzeko epaiketan; Uharten bizi zen, eta abuztuaren 27an hil zen, erietxean. Kolpe larriak zituen; gizonari egozten dizkiote.
Iruzkinak
Ez dago iruzkinik
Ordenatu