Alargun pentsioa, errentaren araberakoa

MADRIL. «Oso eztabaidagarria da norbaitek bere ezkontideak baino bost aldiz gehiago irabaztea, eta, alargun geratzen bada, alarguntza pentsioa betiko kobratzen jarraitzea», adierazi zuen atzo Octavio Granadok, Gizarte Segurantzaren Estatu idazkariak. Proposatu zuen alargun pentsioa onuradunaren errentaren araberakoa izatea.

Azaldu zuenez, kasu batzuetan alargunek hildako ezkontideak baino soldata askoz handiagoa kobratzen dute, «eta ez dirudi bidezkoa familian diru sarrera gehien duenaren errenta gehiago handitzen jarraitzeak». Nagusiki gizonei eragingo lieke proposamenak, soldata arrakala dela-eta batez besteko soldata handiagoa dutelako. «Gizon batek alargun pentsioa jasotzen badu —emazteak baino soldata handiagoa izanda—, hobetu egiten du bere errenta maila; alarguntza emakume batek kobratzen badu (soldata txikiagoa izanda), familiaren errenta okertu egiten da», esplikatu zuen.

Atzokoa Granadok hurrengo gobernuari egindako proposamen bat baino ez da, Gizarte Segurantzaren zenbaki gorriak txikitzeko: 100.000 milioi euroko zuloa pilatu du zazpi urtean.