STOCKHOLM. Suediako Parlamentuko kideek Ulf Kristersson izendatu zuten atzo lehen ministro. Izendapenaren osteko prentsaurrekoan, Kristerssonek esan zuen «umiltasunez» beteko duela postua, eta ohartarazi zuen Suedia eraldatzeak «luze» joko duela.
Kontserbadoreak alde gutxirekin lortu zuen garaipena; 176 boto jaso zituen alde, eta 173 aurka. Hala, agintean lagun izango ditu demokristauak, liberalak eta SD Suediako Demokratak alderdi ultraeskuindarra. SDko buru Jimmie Akesson konforme agertu zen gobernuaren eraketarekin, eta adierazi zuen «eragin esanguratsua» izango dutela. Ezkerreko alderdiek, ordea, ez dute begi onez ikusi gobernuaren osaketa. Lena Hallengren sozialdemokrataren ustez, gobernua «ahula eta hauskorra» izango da.
Suediako lehen ministro izendatu dute Ulf Kristersson
Koalizio gobernuan lagun izango ditu demokristauak eta liberalak, eta SDko ultraeskuindarrak kanpotik
Iruzkinak
Ez dago iruzkinik
Ordenatu