Zaldibarko auzian «zarata» urritzeko eskatu du Ortuzarrek

Zaldibar Argitu plataformak deituta, protesta egin dute zabortegia amildu zeneko bigarren urtemugaren harira

Zaldibar Argitu plataformak antolatutako protesta, igandean. GORKA RUBIO / FOKU Tamaina handiagoan ikusi

2022ko otsailak 8

BILBO. Zaldibarko zabortegian (Bizkaia) orain bi urte jazo zen «hondamendiaren» inguruan «manipulazioa eta erabilera politikoa» bazter uzteko eskatu zuen atzo Euzkadi Buru Batzarreko lehendakari Andoni Ortuzarrek, eta, areago, «kalean zarata urritzeko». Finean, gertatutakoaren inguruko argibideak «justiziak» emango dituela adierazi zuen, eta auzitegien lanak emango duen fruituaren zain geratu behar dela orain. Baina kalean dago oraino gaia.

2020ko otsailaren 6an amildu zen zabortegia, eta bi langile hil ziren. Auziko korapilo ugari askatu gabe daude oraindik, eta herritarren ezinegona ez da arindu; horixe aldarrikatu zuten ehunka lagunek igandean Ermuan (Bizkaia) eginiko manifestazioan. Zaldibar Argitu plataformak deituta, mobilizazioa egin zuten 12:00etan, herriko plazan hasita. Ardurak «argitu» daitezela eskatu zuten.

Pankarta handi bat eraman zuten manifestazioaren buruan; hari eutsiz egin zuten herritarrek Ermuko plazatik zabortegirainoko bidea. Aldarrikapenez josia izan zen mobilizazioa, eta asko izan ziren hondamendiaren ondorioz hildakoei, Alberto Sololuzeri eta Joaquin Beltrani eskainitako mezuak. Beltranen gorpua aurkitu gabe dute oraindik ere, eta mobilizazioaren ondotik biak omentzeko ekitaldi berezi bat egin zuten.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Izan BERRIAlaguna