Defizitak eta zorrak behera egin dute EBn

BRUSELA. Kontu publikoak orekatzen ari dira Europako Batasuneko kideak. Eurostaten arabera, iaz beren kutxetan sartutakoa baino 146.000 milioi euro gehiago gastatu zituzten, hau da, barne produktu gordinaren %1. 2016an %1,6 izanzen defizita. Eurogunean, berriz, defizita %1,5etik %0,9ra jaitsi da. Zorrak, berriz, gorantz egin du eurotan (12,5 bilioira iritsi da EBn), baina behera portzentualki, BPGa baino gutxiago hazi delako. Horrela, %83,3ko zorra zuen EBk 2016an, eta %81,6ra jaitsi zen iaz.

EBren defizitaren zatitik bi heren Frantziari eta Espainiari dagozkio. Lehenak 59.341 milioi euroren zuloa egin zuen, baina, aspaldiko partez, lortu zuen bere defizit publikoa %3ko mugatik behera uztea (%3,4tik %2,6ra jaitsi zen). Mugatik gora geratzen den estatu bakarra da Espainia —%3,1—, defizita 50.401 milioitik 36.223 milioira jaitsi ondoren. Zulo horrek ez dio utzi bere zorra txukuntzen: 1,14 bilioi zor ditu, BPGaren %98,3. Azken lau urteetan bi puntu soilik jan dizkio zorrari.