SDFk «dagokien arduraz jokatzeko» eskatu die AEBei

DAMASKO. SDF Siriako Indar Demokratikoek Afringo erasoaldiari buruz ohar bat argitaratu zuten atzo, Turkiak Kurdistango kantoi autonomo horren aurkako ekinaldia hasi zuenetik lehenengoa. Horretan, AEBek EI Estatu Islamikoaren aurka zuzentzen duten koalizioari eskatu diote «dagokion arduraz jokatzeko»; Errusiari, berriz, argitzeko baimenik eman ote dion Turkiari. «Turkia ez litzateke ausartuko gure herriak bonbardatu eta gure haurren kontra sarraskiak egitera, Errusiako Federazioak bere betebehar moralei uko egin eta Afrinen gainean hegan egiteko oniritzia eman ez balio».

Rex Tillerson AEBetako Estatu idazkariak «kezka» agertu zuen, baina, Turkiari ez ezik, kurduen miliziei ere «moderazioa» eskatu zien, eta Ankarari aitortu «terrorismoarengandik babesteko eskubidea». Recep Tayyip Erdogan Turkiako presidenteak, berriz, Errusiarekin «kontsentsua» dutela esan zuen. Kremlinek ez zuen baieztatu, nahiz eta onartu «harremanak» dituztela. Sotxiko konferentziara «kurduen ordezkaritza bat» gonbidatu du, baina indar nagusiak, PYDk, uko egin dio.