Ibarrangeluko sexu erasoengatik atxilotua, aske

GERNIKA-LUMO. Ertzaintzak gizon bat atxilotu zuen herenegun Gernika-Lumon (Bizkaia), emakume bat bortxatzea eta beste bati sexu erasoa egitea leporatuta. Epaileak aske uztea erabaki du, Europa Press agentziak jakinarazi duenez. Gizonak 25 urte ditu. Segurtasun Sailak azaldu duenez, bi erasoak herenegun goizaldean gertatu ziren, Ibarrangeluko ostatu batean. Bi emakumeak Elantxobeko jaietan izan ziren, eta Ibarrangelun pasa zuten gaua. Azaldu dutenez, beren baimenik gabe sartu zitzaien gizona gelan; bat bortxatu eta besteari ukituak egin zizkion. Ibarrangelun elkarretaratzea egin zuten atzo, gertatutakoa salatzeko.