Baskoniaren lana: gaur Valentzian irabazi, eta itxaron

SASKIBALOIA. Euroligako final-laurdenetarako sailkatzeko lehian partida erabakigarria jokatuko du gaur Baskoniak Valentziaren kantxan (21:00, Dazn). Gasteiztarrek kosta ahala kosta irabazi behar dute. Hori egin ezean, aukerarik gabe geratuko dira. Hala ere, garaipena lortuta ere Baskoniak ez du ziurtatuta zortzi onenen artean sartzea. Horretarako, Real Madrilek galdu egin behar du gaur Fenerbahceren kantxan (19:45), edo Zenitek bihar etxean Maccabiren aurka (19:00) eta datorren astelehenean toki berean Panathinaikosen kontra.

Dusko Ivanovicek nahi baino buruhauste gehiago ditu: Jekiri min hartuta dago, eta Henry, kili-kolo, orkatilako minez. «Azkeneraino borrokatuko ginela esan genuen, eta hemen gaude. Oso pozik nago jokalarien lanarekin. Pazientzia izan behar dugu lehian. Erasoan baliabide asko ditu Valentziak».

Bestalde, Lara Gonzalez IDK-ko kapitainak taldea utziko du sasoi amaieran. Zortzi denboraldi egin ditu, eta 203 lehia jokatu.