Bizkaian hamar pertsona ospitaleratu dituzte Q sukarraren sintomekin

BILBO. Eusko Jaurlaritzako Osasun Sailak jakinarazi duenez, Q sukarra duten hamar pertsona ospitaleratu dituzte, eta beste hemeretziren eboluzioa aztertzen ari dira —14-39 eguneko inkubazio epea du gaitzak—. Dimako Baltzola kobetan (Bizkaia) izan ziren denak apirilean; itxi eta garbitu egin dute ingurua. Abereen bidez kutsatzen da; besteak beste, sukarra eta buruko eta giharretako mina eragiten ditu, baita biriketako infekzioa ere. Gibelean ere eragin dezake. Osasun Sailak jakinarazi du jarraipena egingo duela, neurri berririk behar bada ere.