SASKIBALOIA. Bilbo Basket 81-80 nagusitu zitzaion atzo Gipuzkoa Basketi Miribillan, emozioz betetako derbi batean. Emozioz betetakoa, azken unean eta puntu bakar batengatik erabaki baitzen. Etxeko taldea joan zen ia beti aurretik, baina ez zen gai izan lehia erabakita uzteko, eta bisitariek hori baliatu zuten emaitza iraultzeko: 78-80 ziren aurretik bi minutu falta zirela. Rousellek hiruko bat sartu zuen, eta aurretik jarri zuen Bilbo Basket. GBCk hiru aukera izan zituen irabazteko, baina alferrik galdu zituen hirurak. Hori gutxi ez, eta Echeniquek min hartu zuen. Brown eta Kulboka izan ziren onenak Bilbo Basketen —hamasei puntu sartu zituen bakoitzak—, eta Dee GBCn —24 puntu—. Eguneko beste partidan, Baskoniak aise irabazi zion Andorrari Buesa Arenan: 84-67.
Espainiako Ohorezko Mailan, Araskik eta Gernikak gaur jokatuko dute. Gasteiztarrek erronka latza dute, Perfumerias Avenida liderra hartuko baitute (12:10): espainiarrek jokatutako hemezortzi partidak irabazi dituzte. Lehia samurragoa baina bihurria izango dute bizkaitarrek, Ensinoren kantxan (18:00).
Bilbo Basketek sufrituta irabazi dio GBCri (81-80)
Iruzkinak
Ez dago iruzkinik
Ordenatu