Ruben Garateren irudia kentzeko agindu dute

OTXANDIO. Ruben Garate otxandiarra 2000ko otsailaren 13an hil zen auto istripuz, Madrilen preso bat bisitatzetik zetorrela. Otxandion badago hura oroitzeko horma irudi bat,Berriro gerta ez dadin, dispertsiorik ez leloa daukana, baina orain EAEko Auzitegi Nagusiak hura kentzeko agindu du. Otxandioko alkate Egoitz Garmendiak salatu du udala «jazarpen polizial eta judizial onartezina» jasaten ari dela «Garateren heriotza sakabanaketa politikaren ondorio izan zela adierazteagatik».

Garateren senitartekoak «minduak, erasoak eta gutxietsiak» sentitzen dira, haren anaia Ibon Garatek adierazi duenez. Etxerat elkarteko bozeramaile Patricia Velezek, berriz, esan du salbuespeneko espetxe politikak heriotzak eragin dituela; «eta horiek ere beren lekua izan behar dute memoriaren mapan».