Partida guztiak dira jada erabakigarriak binakakoan

PILOTA. Kolpe latza jaso du Binakako Txapelketak Aimar Olaizolaren lesio larria dela eta, baina lehiak ez du etenik, eta gaur beste bi partida jokatuko dituzte. Erabakigarriak dira biak ala biak. Tafallan (Nafarroa), Bengoetxea-Imaz eta Victor-Aretxabaleta ariko dira. Aurrenekoek irabazi egin behar dute, finalerdietako ligaxkarako sailkatzeko aukera gutxiei eusteko. Beste bikoteak, ordea, jada ez du aukerarik. Azpeitian (Gipuzkoa), berriz, Ezkurdia-Galarza eta Irribarria-Zabaleta izango dira aurrez aurre. Aurrenekoek ere garaipen premian dira, itxaropenari eutsi ahal izateko. Bigarrenek, aldiz, oso ondo bideratua dute sailkapena.