Pilotabizi elkartea: «Pilota amildegira darama Baikok»

PILOTA. Pilotabizi pilotazaleen elkartearen ustez, Baikoren jarrerak «amildegira» darama esku pilota. Horregatik eskatu dio enpresari «hartu duen bide malkartsua» alde batera uzteko. Elkarrizketa mahaian eseri izana aintzat hartzekoa dela dio, baina bidea «zuzendu» behar dela. Enpresari beste eskari batzuk ere egin dizkio: «Ez ditzala hartu orain arteko erabaki berberak, egoera lasaitzeko, eta egoera ekonomikoa elkarrizketa bidez bideratzeko, pilotariek izendatutako ordezkariekin eseri dadila». Horrez gain, eskatu dio Eskiroz, Victor, Laso eta Mariezkurrenarekin hitz egiteko, berriz ere pilotari profesional izan daitezen.

Pilotako Enpresen Ligari ere egin dio eskaera: «Txapelketa irekiak antolatu behar ditu, eta Aspe eta Baiko enpresetako pilotariak izatea ezinbestekoa ez izatea». Administrazioei ere egin die deia, plan estrategikoa lantzeko, eragile guztiekin hitz eginda, eta gogoeta egiteko Enpresen Ligaren ereduaren inguruan, «esku pilotaren etorkizuna bermatzeko».