Gizon bat hil dute Abandoko geltokian, labanaz

2021eko urriak 1

BILBO. Ezbehar larria izan zen atzo arratsaldean Bilbon: gizon bat labankadaz hil zuten Abandoko geltokitik gertu, antza borrokaldi batean. Eusko Jaurlaritzako Segurtasun Sailak eman zuen gertaeraren berri. Jakinarazi zuenez, erasoa arratsaldeko bostak aldera izan zen, Abandoko geltokiaren inguruan. Lehen ikerketen arabera, talde batek inguratu zuen biktima, eta batek labankada bat eman zion. Gizonezkoa geltokiaren barruan babesten saiatu zen, eta han erori zen, inguruan odol errekasto bat utzita. Ertzaintzaren hainbat patruila eta larrialdietako anbulantzia bat geltokira bertaratu ziren, eta zauritua Basurtuko ospitalera eraman zuten, oso larri. Ospitalean artatu zuten medikuek ezin izan zuten ezer egin haren bizia salbatzeko, eta bertan hil zen. Hainbat hedabidek atzo zabaldu zutenez, erasoan hildako gizonak 20 urte inguru zituen.

Eusko Jaurlaritzako Segurtasun Sailak ohar bidez jakinarazi zuenez, erasoa gertatu eta berehala Ertzaintzak polizia operazioa abiatu zuen erasotzaileak atzemateko, eta 20:30ak aldera 18 urteko gizon bat atxilotu zuen Bilbon, ustez erasoan parte hartzeagatik. Gertatutakoa argitzeko ikerketa abiatu du Ertzaintzak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Izan BERRIAlaguna